इम्रान खान यांच्या तपासणीवरून वाद
हृदयाची चाचणी न केल्याचा आरोप
इस्लामाबाद, ता. २४ (पीटीआय) : पाकिस्तानचे माजी पंतप्रधान इम्रान खान यांच्या हृदयाची ‘सीटी कोरोनरी अँजिओग्राफी’ (सीटीए) न झाल्याने त्यांच्या पाकिस्तान तेहरीक-ए-इन्साफ पक्षाने पाकिस्तान सरकारवर टीका केली. आवश्यक सुविधा उपलब्ध असतानाही तपासणी करण्यात आली नसल्याचा आरोप पक्षाने केला असून, खान यांना तातडीने शिफा इंटरनॅशनल रुग्णालयात हलविण्याची मागणी केली आहे.
७३ वर्षीय इम्रान खान यांना शुक्रवारी डोळ्यांच्या उपचारांसह काही वैद्यकीय तपासण्यांसाठी पाकिस्तान इन्स्टिट्यूट ऑफ मेडिकल सायन्सेस रुग्णालयात नेण्यात आले होते. डॉक्टरांनी हृदयाची सीटीए तपासणी करण्याची शिफारस केली होती. मात्र, आवश्यक सुविधा उपलब्ध नसल्याचे रुग्णालय प्रशासनाने सांगितले. त्यानंतर तपासणी न करताच खान यांना अडियाला तुरुंगात परत नेण्यात आले. पीटीआयचे केंद्रीय माहिती सचिव शेख वकास अक्रम यांनी प्रशासनावर गंभीर आरोप केले. एक ऑगस्ट रोजी पीएआयएमएसमधील हृदयरोग तज्ज्ञांनी रक्तदाबातील चढ-उतार, अस्वस्थता आणि हृदयाशी संबंधित गुंतागुंतीचा संभाव्य धोका लक्षात घेऊन सीटीएची शिफारस केली होती, असा दावा त्यांनी केला. या प्रकरणाची दखल घेत पंतप्रधान शाहबाज शरीफ यांनी चौकशी समिती स्थापन केली आहे. तपासणी का झाली नाही आणि त्यासाठी कोण जबाबदार आहे, याचा समिती शोध घेणार आहे. सर्वोच्च न्यायालयाने १८ ऑगस्ट रोजी खान यांना शिफा इंटरनॅशनल रुग्णालयात हलविण्याचे निर्देश दिले होते, असा दावाही पीटीआयने केला आहे. खान यांना ५ ऑगस्ट २०२३ रोजी भ्रष्टाचाराच्या प्रकरणात अटक करण्यात आली होती. तेव्हापासून ते अडियाला तुरुंगात आहेत. त्यांच्या कुटुंबीयांनी आणि समर्थकांनी यापूर्वीही पुरेशी वैद्यकीय सुविधा मिळत नसल्याचे आरोप केले आहेत.
सीटीए म्हणजे काय?
सीटीए सीटी कोरोनरी ॲजिओग्राफी ही हृदयाच्या रक्तवाहिन्यांची तपासणी करण्याची आधुनिक पद्धत आहे.
सीटी स्कॅनच्या साहाय्याने हृदयाच्या रक्तवाहिन्यांची प्रतिमा घेतली जाते.
रक्तवाहिन्यांमध्ये अडथळा आहे का, हे पाहण्यासाठी याचा उपयोग केला जातो.
हृदयाशी संबंधित गुंतागुंतीचा धोका असलेल्या रुग्णांमध्ये डॉक्टर ही तपासणी सुचवू शकतात