पुणे : शेतकऱ्याला पिस्तुलाचा धाक दाखविल्याप्रकरणी प्रशिक्षणार्थी आयएएस अधिकारी पूजा खेडकर यांची आई मनोरमा खेडकर यांच्या पोलिस कोठडीत दोन दिवसांची वाढ करण्यात आली आहे. याबाबत पौड न्यायालयाचे प्रथमवर्ग न्यायदंडाधिकारी सुधीर बरडे यांनी शनिवारी (ता. २०) आदेश दिले.

पिस्तुलाचा धाक दाखवून धमकी दिल्याप्रकरणी मुळशीतील शेतकरी पांडुरंग कोंडिबा पासलकर (वय ६५) यांनी पौड पोलिस ठाण्यात फिर्याद दिली होती. त्यावरून पौड पोलिसांनी पूजा खेडकर यांची आई मनोरमा, वडील दिलीप आणि अंगरक्षकासह सातजणांविरुद्ध गुन्हा दाखल केला होता. त्यानंतर पसार झालेल्या मनोरमा यांना पुणे ग्रामीण पोलिसांनी महाड परिसरातून अटक केली. या गुन्ह्याचा तपास पुणे ग्रामीणच्या स्थानिक गुन्हे शाखेकडे सोपविण्यात आला आहे.

गुन्हे शाखेच्या पथकाने खेडकर यांच्या बाणेर येथील बंगल्याची झडती घेतली. यावेळी पोलिसांनी मनोरमा यांच्या बंगल्यातून पिस्तुलासह तीन काडतुसे जप्त केली होती. मनोरमा यांच्या पोलिस कोठडीची मुदत शनिवारी (ता. २०) संपली. त्यांना आज पौड न्यायालयात हजर करण्यात आले. मनोरमा यांनी पोलिस कोठडीत चांगले जेवण मिळत नसल्याची तक्रार केली. परंतु पोलिसांनी त्यांचे आरोप फेटाळून लावले. या प्रकरणाचा सखोल तपास करण्यासाठी पोलिस कोठडीत वाढ करण्याची मागणी सरकारी वकिलांनी न्यायालयात केली. त्यावर प्रथमवर्ग न्यायदंडाधिकारी बरडे यांनी मनोरमा यांच्या पोलिस कोठडीत सोमवारपर्यंत (ता. २२) वाढ करण्याचे आदेश दिले.