पुणे : पुणेकरांनो, मॉन्सून आता सक्रिय झाला आहे. त्यामुळे पुढील चार दिवस तुम्ही घराबाहेर निघताना रेनकोट, जर्किन किंवा छत्री नक्कीच बरोबर ठेवा. कारण, पुढील चारही दिवस पावसाची शक्यता असून, घाट माथ्यावर मुसळधार पावसाचा इशाराही देण्यात आला आहे.

शहरातील सिंहगड रस्ता, पाषाण, कोथरूड, औंध, बाणेर भागात सकाळी सात वाजल्यापासून पावसाच्या जोरदार सरी पडल्या. मॉन्सूनच्या या रिमझीम सरी दुपारपर्यंत एकामागोमाग एक पडत होत्या. दुपारनंतर पावसाने विश्रांती घेतली. कोरोना प्रतिबंधासाठी लागू केलेले निर्बंध कमी होत आहेत. त्यामुळे सकाळी कार्यालयात जाणाऱ्या कर्मचाऱ्यांच्या वेळेतच पावसाने हजेरी लावली. त्यामुळे शहराला जोडणाऱ्या उपनगरांच्या रस्त्यांवर चौकांमध्ये वाहतूक कोंडी झाल्याचे चित्र दिसत होते.

शहरात दुपारपर्यंत पाऊस आणि त्यानंतर ढगाळ वातावरण त्यामुळे कमाल तापमानाचा पारा ८.५ अंश सेल्सिअसने कमी होऊन २५.८ अंश सेल्सिअस नोंदला गेला. किमान तापमान २३.२ अंश सेल्सिअसची नोंद झाली.

शहरात शिवाजीनगर येथील वेधशाळेत संध्याकाळी साडेपाच वाजेपर्यंत तीन मिलिमीटर पावसाची नोंद झाली. लोहगाव येथे दोन मिलिमीटर पाऊस पडला. शिवाजीनगर येथे १ जूनपासून आतापर्यंत ५०.३ मिलिमीटर पाऊस नोंदल्याची माहिती हवामान खात्यातर्फे देण्यात आली.

पुण्यात पुढील चार दिवस हवामान ढगाळ राहणार असून, शनिवारपर्यंत (ता. १२) हलक्या ते मध्यम स्वरूपाचा पाऊस पडण्याची शक्यताही वर्तविण्यात आली आहे. त्यानंतर म्हणजे रविवारी (ता. १३) शहरात मुसळधार पावसाचा अंदाज व्यक्त करण्यात आला आहे. याच दरम्यान घाट माथ्यावर काही भागात मुसळधार पाऊस पडेल.