इंदापूर, ता. १३ : समाज माध्यमांतून खोटी, दिशाभूल करणारी व मानहानिकारक माहिती प्रसारित करून ओंकार उद्योग समूह व संबंधित साखर कारखान्यांची बदनामी केल्याप्रकरणी रविराज साबळे पाटील (रा. भूम, ता. परांडा, जि. धाराशीव) यांच्या विरोधात इंदापूर पोलिस ठाण्यात गुन्हा दाखल केला आहे.
याबाबत रणजीत बापूराव तावरे (वय ५०, जनरल मॅनेजर, आकार शुगर कारखाना युनिट नं. ११, कर्मयोगी शंकरराव पाटील साखर कारखाना, बिजवडी, ता. इंदापूर) यांनी फिर्याद दिली. त्यानुसार रविराज साबळे पाटील याने त्याच्या समाज माध्यमांवरील खात्यांवरून २९ एप्रिल रोजी एक व्हिडिओ प्रसारित केला. त्यामध्ये ओंकार उद्योग समूह व बाबूराव बोत्रे पाटील यांच्या संदर्भात खोटी, अप्रमाणित, दिशाभूल करणारी व चिथावणीखोर विधाने केल्याचा आरोप फिर्यादी यांनी केला आहे. तसेच, ओंकार उद्योग समूहाच्या १७ युनिटबाबत जाणीवपूर्वक अफवा पसरवून जनमानसात अविश्वास निर्माण करण्याचा प्रयत्न केल्याचेही फिर्यादीत नमूद केले आहे. संबंधित व्हिडिओद्वारे कारखान्यांची प्रतिमा मलिन करून आर्थिक व सामाजिक नुकसान करण्याचा हेतू असल्याचा आरोपही केला आहे.