पुणे - पुण्यातील लोहगाव विमानतळ प्रशासनाने एप्रिल आणि मे महिन्यात प्रवास करणाऱ्यांसाठी मोठी घोषणा केली आहे. या दोन्ही महिन्यात धावपट्टीच्या पुर्नरचना करण्यात येणार असल्यानं विमानसेवा काही काळ बंद राहणार आहे. विमानतळ प्रशासनाने सांगितलं की, धावपट्टीची पुर्नरचना करण्यात येणार असल्यामुळे लोहगाव विमानतळावरील वाहतूक एप्रिल आणि मे महिन्यात 14 दिवसांसाठी बंद राहणार आहे. त्याची दखल घेवून प्रवाशांनी प्रवासाचे नियोजन करावे.

लोहगाव विमानतळाच्या धावपट्टीची पुर्नरचना करण्याचे काम अनेक वर्षे प्रलंबित होते. त्याला गेल्यावर्षी 26 ऑक्‍टोबर रोजी मुहूर्त मिळाला आहे. तेव्हापासून सकाळी 8 ते रात्री 8 दरम्यानच विमान वाहतूक सुरू आहे. सुमारे एक वर्ष हे काम चालेल, असे लोहगाव विमानतळ प्रशासनाने या पूर्वीच स्पष्ट केले आहे. या पार्श्‍वभूमीवर लोहगाव विमानतळावरील वाहतूक आता 26 एप्रिल ते 9 दरम्यान पूर्णतः बंद राहणार आहे. 10 मे पासून सकाळी 8 ते रात्री 8 दरम्यान विमान वाहतूक सुरू होईल.

हे वाचा - पुण्यात क्वारंटाइन सेंटर बंद, कॉलेज सुरू कधी होणार?

लोहगाव विमानतळ हवाई दलातर्फे संचलीत होतो. धावपट्टीच्या पुर्नरचनेच्या कामामुळे एप्रिल- मे मध्ये 14 दिवस विमान वाहतूक बंद ठेवण्यात येणार आहे, असे हवाई दलाने कळविले आहे. त्यामुळे लोहगाव विमानतळ प्रशासनाने ट्‌विटरद्वारे या बाबतची माहिती रविवारी प्रवाशांना दिली.

पुण्यातील इतर बातम्या वाचण्यासाठी क्लिक करा

विमानतळावरून सध्या सकाळी 8 ते रात्री 8 दरम्यान सध्या सुमारे 40 विमानांची दररोज वाहतूक होत आहे. एप्रिल- मे मध्ये 14 दिवस विमान वाहतूक बंद राहणार असल्यामुळे प्रवाशांची मोठी गैरसोय होण्याची शक्‍यता आहे. त्यामुळे दिलेल्या पूर्वसूचनेनुसार प्रवाशांनी नियोजन करावे, असे आवाहन विमानतळ प्रशासनाने केले आहे.