कोंढवा - महंमदवाडी येथील दिल्ली पब्लिक स्कूलजवळील मॅजिस्टीक युरीस्का या अकरा मजली इमारतीत शेवटच्या मजल्यावरील एका सदनिकेला मोठ्या प्रमाणात आग लागली होती. कोंढवा अग्निशामक दलाने वर्दी मिळताच घटनास्थळी धाव घेत आग आटोक्यात आणली.

अग्निशमन जवानांनी धुरामुळे प्रथम गच्चीवर असलेल्या चार पुरुष आणि दोन महिला अशा सहा जणांना बीए सेट परिधान करत सुखरुप ठिकाणी हलविले आणि पाण्याचा मारा सुरु केला. तसेच, आग इमारतीत इतरत्र पोहोचणार नाही, याची खबरदारी घेतल्याने मोठा धोका टळला. वीस मिनिटात जवानांनी आग नियंत्रणात आणत कुलिंग सुरू केले.

सदर सदनिकेतील सर्व गृहपयोगी साहित्य जळाले असून आगीचे नेमके कारण समजू शकले नाही. सदर इमारतीत असणारी स्थायी अग्निशमन यंत्रणा बंद अवस्थेत होती. सदर ठिकाणी आग मोठ्या स्वरूपात असल्याने आठ अग्निशमन वाहनांसोबत उंच शिडीचे वाहन रवाना करण्यात आले होते. जवानांनी वेळेत आग आटोक्यात आणत मोठा धोका टाळला.

अग्निशमन दलाचे प्रमुख देवेंद्र पोटफोडे यांच्या मार्गदर्शनाखाली अग्निशमन अधिकारी कैलास शिंदे, समीर शेख, प्रमोद सोनावणे, पंकज जगताप, राजेश जगताप, सुभाष जाधव व इतर सुमारे ३० जवानांनी आग आटोक्यात आणण्यासाठी परिश्रम घेतले.