पुणे - मैत्रिणीबरोबर घरात मद्य पार्टी केल्यानंतर १६ वर्षीय मुलीने आत्महत्या केल्याचा धक्कादायक प्रकार येरवड्यात घडला. आत्महत्या करणाऱ्या मुलीबरोबर असलेली मैत्रीण बेशुद्धावस्थेत सापडली आहे. तिच्यावर सध्या ससून रुग्णालयात उपचार सुरू आहेत.

मुलीने आत्महत्या का केली? याचे कारण अद्याप समजू शकलेले नाही. या प्रकरणाचा येरवडा पोलिसांकडून तपास करण्यात येत आहे. तनिषा शांताराम मनोरे (वय १६) असे आत्महत्या केलेल्या मुलीचे नाव आहे. मद्य पार्टीत आणखी एक १६ वर्षीय मुलगी अतिमद्यसेवनामुळे बेशुद्ध अवस्थेत आढळून आली आहे. या प्रकरणी येरवडा पोलिस ठाण्यात आकस्मिक मृत्यूची नोंद झाली आहे.

पोलिसांनी दिलेल्या माहितीनुसार, तनिषा येरवड्यातील लक्ष्मीनगर भागात राहायला आहे. ती एका महाविद्यालयात अकरावीत होती. तिची आई भाजी विक्रीचा व्यवसाय करते. सोमवारी (ता. १५) सायंकाळी दोन मैत्रिणींनी तनिषाच्या घरी मद्य पार्टी केली. तनिषाच्या शेजारी राहणाऱ्या एका मुलाला तनिषाच्या मैत्रिणीने दूरध्वनी करून रात्री आठच्या सुमारास बोलावून घेतले. त्यानंतर मुलगा घरी आला. त्याने घरात डोकावून पाहिले.

तेव्हा तनिषाने गळफास घेतल्याचे उघडकीस आले. त्याने तनिषाला खाली उतरवले. चेहऱ्यावर पाणी मारून तिला शुद्धीवर आणण्याचा प्रयत्न केला. त्याने तनिषाच्या आईला घटनेची माहिती दिली. त्यानंतर तनिषाला रुग्णालयात दाखल केले होते. उपचारांपूर्वीच तिचा मृत्यू झाला होता. तनिषाची मैत्रीणही बेशुद्धावस्थेत सापडली. तिला जागे करण्याचा प्रयत्न करण्यात आला. तेव्हा ती मद्याच्या नशेत असल्याचे लक्षात आले.

तिच्या आई-वडिलांनी तिला ससून रुग्णालयात उपचारासाठी दाखल केले. या घटनेची माहिती मिळताच येरवडा पोलिसांनी घटनास्थळी धाव घेतली. पोलिसांनी पाहणी केली असता तनिषा आणि मैत्रिणीने मद्य पार्टी केल्याचे उघडकीस आले. दारू पार्टीनंतर त्यांनी उलट्या केल्याचे पोलिसांनी सांगितले.

तनिषाची मैत्रीण बेशुद्ध झाल्याने तनिषाने आत्महत्या का केली, तसेच तिने कधी गळफास घेतला, या बाबतची माहिती समजू शकली नाही. वरिष्ठ पोलिस निरीक्षक रवींद्रकुमार शेळके यांच्या मार्गदर्शनाखाली गुन्ह्याचा तपास सुरू आहे.