पुणे - शहराच्या मध्यवर्ती भागातील रस्त्याच्या दुरवस्थेवर नागरिकांकडून टीका (Comment) केली जात असताना, आता भाजपच्या आमदार मुक्ता टिळक (Mukta Tilak) यांनीही स्थायी समिती (Standing Committee) आणि प्रशासनावर (Administrative) निशाणा साधला आहे. नागरिकांची गैरसोय होत असताना त्यावर स्थायी समिती आणि प्रशासन गंभीर नाही, त्यांनी त्यांच्यातील हेवेदावे त्वरित मिटवावे आणि शिवाजी रस्ता चांगला करून द्यावा, असा सल्ला पत्रकातून दिला आहे.

पाणी पुरवठा, सांडपाणी वाहिनी याचे काम करण्यासाठी गेल्या १० महिन्यापासून शिवाजी रस्ता, बाजीराव रस्ता यासह इतर भागात काम सुरू आहे. हे काम करत असताना योग्य नियोजन नसल्याने नागरिकांना याचा त्रास सहन करावा लागत आहे. आता हे रस्ते १० ते १५ फेब्रुवारी दरम्यान दुरुस्त केले जातील असा दावा प्रशासनाने केला आहे. तसेच स्थायी समिती अध्यक्ष हेमंत रासने यांनीही ही माहिती दिली होती.

आमदार मुक्ता टिळक यांनी अंदाजपत्रकात बाजीराव रस्त्यावर उड्डाणपूल प्रस्तावित करून त्यासाठी ‘स’ यादीतून २कोटी रुपये तरतूद केली. पण हा प्रकल्प करणे शक्य नसल्याने या दोन कोटी पैकी एक कोटी रुपये शिवाजी रस्त्याचे डांबरीकरण करण्यासाठी वर्गीकरण करण्याचा प्रस्ताव टिळक यांनी दिला होता. यामध्ये प्रशासनाने माझी दिशाभूल करून या निधीची गरज नसल्याचे सांगितले. पण नंतर निधीची गरज असल्याचे सांगून निधीची मागणी केली. यामध्ये स्थायी समिती अध्यक्ष रासने यांच्याशीही चर्चा करूनही व निधीची गरज असतानाही वर्गीकरण करण्याचा निर्णय करण्यास दोन महिने लावले.

यासर्व प्रकारावरून स्थायी समिती व प्रशासन नागरिकांना होणाऱ्या गैरसोयीबद्दल गंभीर नाही. त्यांनी परस्परांमधील हेवेदावे संपवावे. मला यामध्ये कोणतीही श्रेयवादाची लढाई लढवायची नाही. शिवाजी रस्ता खूप रहदारीचा असल्याने नागरिकांची सोय होणे महत्त्वाचे आहे, असे मुक्ता टिळक यांनी निवेदनात नमूद केले आहे.