मुंबईतील चाैपाट्या
तत्काळ स्वच्छ करा
मुंबई, ता. २२ : मुंबईतील समुद्रकिनाऱ्यांवर साचणारा कचरा, प्लॅस्टिक आणि नाल्यांतून समुद्रात मिसळणाऱ्या घाणीची गंभीर दखल घेऊन महाराष्ट्र प्रदूषण नियंत्रण मंडळाने महापालिकेला धारेवर धरले आहे. जुहू, गोराई, वर्सोवा, दादरसह सर्व समुद्रकिनाऱ्यांचे तातडीने सर्वेक्षण करून अतिरिक्त यंत्रसामग्री व मनुष्यबळ उपलब्ध करा, असे कडक निर्देश एमपीसीबी अध्यक्ष सिद्धेश कदम यांनी दिले.
‘चाैपाटी स्वच्छता मोहिमे’चा सविस्तर आढावा घेण्यासाठी पालिका मुख्यालयात एमपीसीबीचे अध्यक्ष सिद्धेश कदम आणि मुंबई पालिकेचे अतिरिक्त आयुक्त बिपिन शर्मा यांच्या प्रमुख उपस्थितीत बैठक झाली. मुंबईतील समुद्रकिनाऱ्यांची स्वच्छता आणि पर्यावरणाशी संबंधित विविध मुद्द्यांवर सखोल चर्चा करण्यात आली. ​ बैठकीदरम्यान जुहू, गोराई, वर्सोवा, दादरसह मुंबई शहर व उपनगरांतील सर्वच समुद्रकिनाऱ्यांचा आढावा घेण्यात आला. मुंबईतील नाल्यांतून वाहून येणाऱ्या प्लॅस्टिक कचऱ्यावर तातडीने कठोर कारवाई करण्याचे निर्देश सिद्धेश कदम यांनी दिले. यावर तोडगा काढण्यासाठी प्रदूषण नियंत्रण मंडळाने ‘द ओशन क्लीनअप’ या आंतरराष्ट्रीय संस्थेसोबत करार केला आहे. या प्रकल्पासाठी महापालिकेने पुढाकार घ्यावा, असे त्यांनी नमूद केले.