रिक्षा, टॅक्सी भाडेवाढीला एमएमआरटीएची मंजुरी मुंबईकरांचा प्रवास महागणार सकाळ वृत्तसेवा मुंबई, ता. २१ : मुंबई महानगर प्रदेश परिवहन प्राधिकरणाने (एमएमआरटीए) इंधनाच्या वाढत्या किमती व वाढलेल्या परिचालन खर्चाचा विचार करून रिक्षा, टॅक्सींच्या किमान भाड्यात वाढ मंजूर केली आहे. त्यामुळे मुंबईकरांचा प्रवास महागणार आहे. नव्या दरानुसार रिक्षाचे किमान भाडे २६ रुपयांवरून २७ रुपये, तर काळ्या-पिवळ्या टॅक्सीचे किमान भाडे ३१ रुपयांवरून ३३ रुपये होणार आहे. हे दोन्ही दर पहिल्या १.५ किलोमीटर अंतरासाठी लागू असतील. अतिरिक्त मुख्य सचिव संजय सेठी यांच्या अध्यक्षतेखाली झालेल्या एमएमआरटीएच्या बैठकीत हा निर्णय घेण्यात आला. अधिसूचना जारी झाल्यानंतर पुढील काही आठवड्यांत नवीन भाडेदर लागू होण्याची शक्यता आहेत. अधिकाऱ्यांच्या म्हणण्यानुसार, सीएनजी, पेट्रोल आणि डिझेलच्या वाढत्या किमतींमुळे रिक्षा आणि टॅक्सीचालकांचा परिचालन खर्च वाढला आहे. त्याच पार्श्वभूमीवर भाडेवाढ आवश्यक असल्याचे त्यांनी सांगितले. रिक्षा, टॅक्सी संघटना अनेक महिन्यांपासून भाडेवाढीची मागणी करीत होत्या. मे महिन्यात महानगर गॅस लिमिटेडने (एमजीएल) सीएनजीचा दर ८६ रुपये प्रतिकिलो केल्यानंतर मुंबई रिक्षा मेन्स युनियनने प्रतिकिलोमीटर १.१२ रुपयांची वाढ मागितली होती. ही भाडेवाढ २०१७च्या बी. सी. खटुआ समितीच्या शिफारशींनुसार करण्यात आली आहे. यापूर्वी फेब्रुवारी २०२५ मध्ये रिक्षा आणि टॅक्सीच्या किमान भाड्यात प्रत्येकी तीन रुपयांची वाढ करण्यात आली होती.