पुणे : शहरातील २७० ॲमेनिटी स्पेस भाडेतत्त्वावर देण्याच्या भारतीय जनता पक्षाच्या (BJP) प्रस्तावाला पुन्हा विरोध करण्याचा निर्णय राष्ट्रवादी कॉंग्रेसने (NCP) गुरुवारी घेतला. या ठरावाला पाठिंबा देण्याचा निर्णय राष्ट्रवादी कॉंग्रेसने बुधवारी घेतला होता. या पार्श्वभूमीवर महापालिकेची (pune corporation) सर्वसाधारण सभा तहकूब झाली आणि ॲमेनिटी स्पेस भाडेतत्त्वावर देण्याचा ठराव लांबणीवर पडला.

राष्ट्रवादी कॉंग्रेसने बुधवारी सायंकाळी महापालिकेत पत्रकार परिषद घेऊन ॲमेनिटी स्पेसचा आराखडा करणार आणि ३३ टक्के जागा अर्बन स्पेससाठी राखीव ठेवणार, या उपसूचनांच्या बदल्यात ठरावाला पाठिंबा दिला होता. राष्ट्रवादी कॉंग्रेसने अचानक भूमिका बदलल्यामुळे सर्वांनाच आश्चर्याचा धक्का बसला. राष्ट्रवादी कॉंग्रेसमध्येही खदखद निर्माण झाली.

हा सर्व प्रकार उपमुख्यमंत्री आणि पक्षाचे नेते अजित पवार यांच्यापर्यंत गेला. त्यांनी ‘तुम्ही सगळ्यांनी बैठक घेऊन भूमिका निश्चित करा,’ असे सांगितले. त्यानंतर गुरुवारी सकाळी ११ वाजता राष्ट्रवादी कॉंग्रेसची महापालिकेत बैठक झाली. त्यात बहुसंख्य नगरसेवकांनी ठरावाला विरोध करण्याची भूमिका घेतली. त्यानुसार पक्षाने ठरावाला विरोध करण्याचे जाहीर केले.

महापालिकेच्या सर्वसाधारण सभेचे कामकाज दुपारी तीन वाजता सुरू झाले. परंतु, कल्याणसिंह, डॉ. गेल ऑम्वेट, शरद महाजन यांचे निधन झाल्यामुळे त्यांना श्रद्धांजली अर्पण करून सभेचे कामकाज तहकूब करण्यात आले. त्यामुळे ॲमेनिटी स्पेस भाडेतत्त्वावर देण्याचा आणि स्वारगेट- कात्रज भुयारी मेट्रोला मंजूरी देण्याचा ठराव लांबणीवर पडला. दरम्यान, राष्ट्रवादी कॉंग्रेसने पुन्हा भूमिका बदलल्यामुळे ठराव लांबणीवर पडला, अशी महापालिका वर्तुळात चर्चा आहे. भाजपने महापालिकेत बहुमतच्या जोरावर ठराव मंजूर करून घेतला असता तरी, राज्य सरकारने तो अडविला असता. त्यामुळे या ठरावाबाबत पुन्हा सहमती करण्याचे प्रयत्न भाजपने सुरू केला आहे.