पिंपरी : पुणे जिल्ह्यातीलच नाही तर राज्यभरातून राष्ट्रवादीच्या अनेक विधानसभेच्या इच्छुकांनी ऑनलाईन अर्ज केले आहेत. त्यात अनेक प्रबळ व भावी उमेदवारांचा समावेश आहे. मात्र, ऑनलाईन अर्ज दिल्याने या मातब्बरांचा जिल्हाध्यक्षांनी जाहीर केलेल्या इच्छुकांच्या यादीत समावेश नसल्याने गोंधळ झाला आहे. त्यातून या दावेदारांच्या समर्थकांत संभ्रम पसरला आहे. 

मावळमधील राष्ट्रवादीचे प्रबळ दावेदार बापूसाहेब भेगडे व खेड-आळंदी विधानसभा मतदारसंघातील मातब्बर इच्छुक आणि माजी आमदार दिलीप मोहिते-पाटील आदींनी ऑनलाईन अर्ज दिले आहेत. त्यामुळे त्यांचा जिल्हाध्यक्ष प्रदीप गारटकर यांनी जाहीर केलेल्या यादीत समावेश नाही. परिणामी, त्यांच्या समर्थकांत काहीसे गोंधळाचे वातावरण पसरलेले आहे. मात्र, स्वत: त्यांनीच त्याबाबत खुलासा केल्याने हा संभ्रम आता संपणार आहे. दरम्यान, गारटकर यांनीही या ऑनलाईन घोळाला दुजोरा दिला. जिल्ह्यातून किमान आठ-दहा जणांनी ऑनलाईन अर्ज केले असावेत. त्यांची माहिती आज संध्याकाळपर्यंत उपलब्ध होईल. परिणामी, जिल्ह्यातील एकूण इच्छुकांची संख्या वाढेल, असे ते 'सरकारनामा'शी बोलताना म्हणाले. 

ऑनलाईनखेरीज काहींनी जिल्हाध्यक्षांऐवजी थेट मुंबईत पक्षश्रेष्ठींकडेच इच्छुक म्हणून दावेदारी दाखल केलेली आहे. त्यामुळे त्यांचेही नाव संबंधित जिल्हाध्यक्षांच्या यादीत नाही. परिणामी त्यांचेही समर्थक तूर्त गोंधळून गेले आहेत, असे शिरूरचे तगडे दावेदार मंगलदास बांदल यांच्याबाबतीत घडले आहे. खुद्द पवारसाहेबांनीच शब्द दिल्याने विधानसभा लढणार नाही, असे होणारच नाही, असे त्यांनी सरकारनामाला सांगितले. मी व पत्नी अशा दोघांनीही इच्छुक म्हणून पक्ष श्रेष्ठींकडे मुंबईत अर्ज दिले असल्याची माहिती त्यांनी दिली.