ओतूर, ता. २४ : कृषी उत्पन्न बाजार समिती जुन्नरचा उपबाजारात ओतूर (ता. जुन्नर) येथे रविवारी (ता.२३) उन्हाळी कांद्याची मोठी आवक झाली. बाजारात ३२ हजार ३३३ पिशव्यांची आवक झाली. बाजारात गोळा कांद्याला कमाल ४५१ रुपये प्रति १० किलो बाजारभाव मिळाला.
ओतूर येथील दुय्यम बाजाराच्या आवारात दर गुरुवारी आणि रविवारी कांदा लिलाव होतात. लिलावाची वेळ सकाळी १० वाजता सुरू होते व लिलाव पूर्ण होईपर्यंत चालतो. त्यामुळे परिसरातील कांदा उत्पादक शेतकऱ्यांकडून ओतूर बाजार आवाराला पसंती दिली जात आहे, अशी माहिती कृषी उत्पन्न बाजार समिती जुन्नरचे सभापती ॲड. संजय काळे, उपसभापती निवृत्ती काळे व व्यवस्थापक दीपक म्हस्करे यांनी दिली.

कांद्याचा बाजारभाव प्रति दहा किलो : गोळा : ४००-४५१, सुपर : ३३०-४१०, गोल्टी/गोल्टा : १००-३३०, बदला : १००- २७५.