पाणंद रस्त्यात अडथळा केल्यास कडक कारवाई
--
‘महाराजस्व’ समाधान शिबिरात प्रांताधिकारी मौसमी चौगुले यांचा इशारा
--

ॲग्रोवन वृत्तसेवा
कसबा बीड, जि. कोल्हापूर : पाणंद रस्त्यांमध्ये अडथळा निर्माण करून शेतकरी व नागरिकांच्या हक्काच्या मार्गात अडसर आणणाऱ्यांविरुद्ध कठोर कारवाई करण्यात येईल, असा इशारा प्रांताधिकारी मौसमी चौगुले यांनी दिला.

कसबा बीड येथे आयोजित ‘छत्रपती शिवाजी महाराजस्व समाधान शिबिर’ अभियानात त्या बोलत होत्या. यावेळी त्यांनी शासनाच्या विविध योजनांची माहिती देत नागरिकांनी योजनांचा लाभ घ्यावा, असे आवाहन केले.

पाणंद रस्ते हा ग्रामीण भागातील शेतकऱ्यांच्या दैनंदिन शेती व्यवहाराशी निगडित जिव्हाळ्याचा विषय असून, कोणत्याही प्रकारचा अडथळा सहन केला जाणार नाही, असेही त्यांनी स्पष्ट केले. गावपातळीवरील महसुली व शेतीसंबंधित प्रश्न तत्काळ मार्गी लावण्यासाठी प्रशासन कटिबद्ध असल्याचे त्यांनी सांगितले.

शिबिरात तहसीलदार स्वप्नील पवार, भूमी अभिलेख अधीक्षक किरण माने आणि तालुका कृषी अधिकारी युवराज पाटील यांनी विविध शासकीय योजनांबाबत मार्गदर्शन केले. महसूल, कृषी आणि पंचायत समितीच्या विविध विभागांनी नागरिकांच्या तक्रारी व समस्या जाणून घेत तत्काळ निवारणाचा प्रयत्न केला.

कार्यक्रमास पंचायत समिती सदस्य लता दिघे, मेघा नाळे, निवास पाटील, आनंद कांबळे, शिरोली दुमाला येथील लोकनियुक्त सरपंच सचिन पाटील, कृषी संचालक उत्तम वसरे, दादासो लाड, किशोर पाटील, लक्ष्मीकांत पाटील यांच्यासह ग्रामस्थ मोठ्या संख्येने उपस्थित होते.