पुणे - पीएमपीच्या ताफ्यात नव्या ४२५ वातानुकूलित (एसी) बस २६ जानेवारीपर्यंत दाखल होणार आहेत. त्यासाठीची निविदा प्रक्रिया पूर्ण झाली आहे. तसेच सध्याच्याच भाडेदरात ‘एसी’ बस प्रवाशांना उपलब्ध होणार असल्यामुळे शहर आणि पिंपरी- चिंचवडमधील प्रवाशांना काही प्रमाणात तरी दिलासा मिळणार आहे. नव्या बसमधील २५ ई-इलेट्रिक, तर ४०० बस या सीएनजीवर धावणाऱ्या असतील.

पीएमपीच्या संचालक मंडळाने १५० ई-बस आणि दोन्ही महापालिकांच्या निधीतून ४०० बस विकत घेण्यासाठी या पूर्वीच मंजुरी दिली आहे. तसेच ई-बसची चाचणीही नुकतीच घेण्यात आली. या पार्श्‍वभूमीवर बस विकत घेण्यासाठीची निविदा प्रक्रिया आता पार पडली असून, येत्या आठवडाभरात संबंधित कंपन्यांना कार्यआदेश दिले जातील, असे पीएमपी प्रशासनाने सांगितले. १५० पैकी २५ ई- बस पहिल्या टप्प्यात येतील. त्यांची लांबी ९ मीटर असेल. दोन्ही शहरांच्या मध्यभागातही त्या वापरता येतील. तसेच सीएनजीवर धावणाऱ्या बस या १२ मीटर रुंदीच्या असतील. या बस बीआरटी मार्गांसाठीही उपयुक्त ठरतील. त्यातून बीआरटीची वाहतूक सुरळीत होऊ शकेल. पहिली तीन वर्षे या बसची देखभाल दुरुस्ती संबंधित कंपन्या करणार आहेत. तसेच कोणतीही भाडेवाढ न करता या एसी बस प्रवाशांना उपलब्ध होणार आहेत.

पीएमपीच्या ताफ्यात बसची संख्या अपुरी असल्यामुळे दोन्ही शहरांत चांगली सेवा देण्यावर मर्यादा येत आहे. २६ जानेवारीपर्यंत नव्या बस दाखल होतील, अशी अपेक्षा आहे. 
- नयना गुंडे,अध्यक्ष आणि व्यवस्थापकीय संचालक, पीएमपी

बसची संख्या तातडीने वाढविल्याशिवाय पीएमपीची परिस्थिती सुधारणार नाही. म्हणूनच नव्या बस तातडीने उपलब्ध व्हाव्यात, यासाठी पाठपुरावा सुरू आहे. 
- सिद्धार्थ शिरोळे,संचालक, पीएमपी 

पीएमपीमध्ये नव्या बस हव्यातच. आमच्या मार्गावर बसची संख्या खूप कमी असल्याने अनेकदा हाल होतात. उपनगरातील प्रवासी केवळ पीएमपीवरच अवलंबून आहेत. त्यामुळे नव्या बस लांबच्या मार्गावर सोडल्या पाहिजेत. 
- अभिजित शिंदे, प्रवासी, रा. कोंढणपूर