पुणे - कोरोनामुळे (Corona) एक वर्ष मुदतवाढ मिळाल्यानंतर आता पुणे बार असोसिएशन (पीबीए) (Pune Bar Association) च्या नवीन कार्यकारिणीसाठी १८ फेब्रुवारी रोजी मतदान (Voting) होणार आहे. सकाळी नऊ ते सायंकाळी साडेपाच दरम्यान मतदान होणार असून, त्याच दिवशी सायंकाळी साडेसहानंतर मतमोजणी होऊन निकाल जाहीर केला जाणार आहे.

पीबीएच्या निवडणुकीचे मुख्य निवडणूक अधिकारी ॲड अशोक संकपाळ यांनी निवडणुकीचा कार्यक्रम जाहीर केला आहे. त्यानुसार बुधवारपासून (ता. २) पासून शुक्रवारपर्यंत (ता. ४) सकाळी ११ ते सायंकाळी पाच वाजेपर्यंत उमेदवारी नामांकन अर्ज वाटप व स्वीकारला जाणार आहे. चार फेब्रुवारी ही उमेदवारी अर्ज दाखल करण्याची अंतिम मुदत आहे. पाच फेब्रुवारीला उमेदवारी अर्जाची छाननी होणार आहे. तर सात फेब्रुवारी उमेदवारी अर्ज मागे घेण्याची अंतिम तारीख आहे. आठ फेब्रुवारीला उमेदवारांची अंतिम यादी प्रसिद्ध केली जाणार आहे. १८ फेब्रुवारीला प्रत्यक्ष मतदान होणार आहे. त्याच दिवशी सायंकाळी साडेसहानंतर मतमोजणी आणि निकाल जाहीर केला जाणार आहे.