राजगुरूनगर : येथील वाडा रस्त्यावरील गृहप्रकल्पात राहणाऱ्या तरूण विवाहितेचा, नवर्‍याच्या प्रेयसीनेच गळा घोटल्याचे निष्पन्न झाले असून खेड पोलिसांनी संशयित आरोपी महिलेस अटक केली आहे.

कोमल गणेश केदारी ( वय २८ वर्षे, रा. शिवसाम्राज्य सोसायटी, वाडा रोड, राजगुरूनगर ता. खेड. ) या विवाहितेचा संशयित रितीने मृत्यू झाल्याची घटना बुधवारी दुपारी घडली होती. शवविच्छेदन अहवालानंतर तिचा गळा आवळून खून झाल्याचे निष्पन्न झाले होते. तिचा पती गणेश भिकाजी केदारी हा कंपनीत कामावर गेल्यानंतर, दुपारी एकटी घरात झोपली असताना तिचा कोणीतरी गळा आवळून खून केला होता.

खेड पोलिस ठाण्यात दुसऱ्या दिवशी अज्ञात व्यक्तीविरुद्ध खुनाचा गुन्हा दाखल करण्यात आला होता. खेड पोलिस आणि गुन्हे शाखेच्या पोलिसांनी गुप्त माहितीगारांमार्फत व तांत्रिक विश्लेषणाच्या आधारे दोन दिवसांत या गुन्ह्याचा छडा लावला. प्रियकराच्या प्रेयसीनेच कोमलचा तिच्याच ओढणीने गळा आवळून खून केल्याचे तपासात निष्पन्न झाले.