पारगाव : धामणी ता. आंबेगाव येथील जयहिंद वाचनालयात खास वाचकांसाठी आज सोमवारी लक्ष्मीपूजनाच्या दिवशी दिवाळी अंकाचे प्रदर्शन भरवण्यात आले होते. या प्रदर्शनात सुमारे ७० प्रकारचे दिवाळी अंक उपलब्ध करून देण्यात आले होते.

ग्रामीण भागातील वाचकांना शहरी भागातील वाचकांप्रमाणे विशेष करून महिला वाचकांना सर्व प्रकारचे दिवाळी अंक वाचायला मिळावे यासाठी जयहिंद वाचनालयाच्या वतीने दरवर्षी दिवाळीला वेगवेगळे दिवाळी अंक उपलब्ध करून दिले जातात. वाचकांना या दिवाळी अंकाची माहिती मिळावी म्हणून या दिवाळी अंकाचे प्रदर्शनाचे आयोजन केले जाते.

यावर्षी सर्व वृत्तपत्रांचे दिवाळी अंक, आवाज,जत्रा, शतायुषी, आक्रोश,गृहशोभिका, ज्योतिष तंत्र मंत्र,हास्य धमाल, पोलीस शोधकथांवरील पोलीस टाईमस् व लहान मुलांसाठी चंपक,रानवारा, हस्ती दुनिया, किशोर,

आणि दहावी बारावीच्या विद्यार्थ्यांसाठी मार्गदर्शक दिवाळी अंक, ज्योतिष, आरोग्य शेती, विनोदी, धार्मिक, शैक्षणिक, क्रीडा, चित्रपट, साहित्य,पाककला, या विषयातील असे एकूण ७० दिवाळी अंक उपलब्ध करून देण्यात आले असल्याची माहिती ग्रंथपाल दिलीप आळेकर यांनी दिली.

या दिवाळी अंक प्रदर्शनाचे उद्घाटन सरपंच सागर जाधव यांच्या हस्ते झाले यावेळी जयहिंद वाचनालयाचे अध्यक्ष प्रमोद देखणे, माजी सरपंच अंकुश भूमकर, चिंतामणी जाधव, अक्षय विधाटे,रेश्मा बोऱ्हाडे, सुनीता बोऱ्हाडे, राजाराम विधाटे, वंदना दहिवळ, निर्मला कासार, मच्छिंद्र अमाप, पांडुरंग बोऱ्हाडे, तानाजी रोडे, किसन विधाटे, ग्रंथपाल दिलीप आळेकर, संदीप आळेकर उपस्थित होते.