पुणे - पुणे जिल्ह्यातील दुर्गम भागातील ३५५ शाळांना आणि अंगणवाड्यांना संभाव्य अतिवृष्टीच्या पार्श्वभूमीवर दोन दिवस सुट्टी जाहीर करण्यात आली आहे. जिल्हाधिकारी डॉ. राजेश देशमुख यांनी याबाबतचा आदेश जिल्हा परिषदेला दिला आहे.

या आदेशानुसार या शाळा गुरुवारी (ता.२०) आणि शुक्रवारी (ता.२१) बंद राहणार आहेत. मात्र या शाळांना सुट्टी देण्यात आली असली तरी शिक्षक आणि मुख्याध्यापकांना आपापल्या शाळांवर उपस्थित रहावे लागणार आहे.

जिल्हादंडाधिकारी डॉ. देशमुख यांनी काल (बुधवारी) रात्री घाट भागात झालेल्या पावसामुळे खबरदारीचा उपाय म्हणून या शाळा बंद ठेवण्याचा आदेश दिला आहे. शाळांबरोरच या भागातील अंगणवाड्याही बंद ठेवल्या जाणार आहेत.

या आदेशानुसार या भागातील सर्व अंगणवाडी, खासगी, अनुदानित, विनाअनुदानित प्राथमिक व माध्यमिक शाळा, जिल्हा परिषद शाळा, सर्व मंडळांच्या अनुदानित व खाजगी शाळांना ही सुट्टी असणार आहे.

जिल्हा परिषदेने प्राथमिक शिक्षकांच्या जिल्हांतर्गत बदल्यांसाठी याआधीच जिल्ह्यातील अवघड क्षेत्रातील शाळांची यादी जाहीर केलेली आहे. या यादीनुसार जिल्ह्यात अवघड क्षेत्रातील ३५५ शाळा निश्‍चित करण्यात आलेल्या आहेत.

सुट्टी दिलेल्या झेडपी शाळांची तालुकानिहाय संख्या

आंबेगाव --- ७३

बारामती --- शून्य

भोर --- ३६

दौंड --- शून्य

हवेली --- शून्य

इंदापूर --- शून्य

जुन्नर --- ३५

खेड --- ३६

मावळ --- ४८

मुळशी --- ६७

पुरंदर --- १७

शिरूर --- शून्य

वेल्हे --- ४३

एकूण --- ३५५