पुणे - सावित्रीबाई फुले पुणे विद्यापीठातील (Pune University) पीएच.डी. आणि स्पर्धा परीक्षांच्या विद्यार्थ्यांची वसतिगृहे (Hostels) सोमवार (ता. २१) पासून खुली (Open) करण्यात येणार आहे. तर इतर वसतिगृहे आयुक्तांची परवानगीनंतर ५० टक्के उपस्थितीत सुरू होणार आहे.

महाविद्यालयांबरोबरच विद्यापीठातील विभागांचे प्रत्यक्ष वर्ग सुरू झाले आहेत. मात्र राहण्याची व्यवस्था नसल्यामुळे विद्यार्थ्यांना अनेक अडचणींचा सामना करावा लागत होता. विद्यापीठाने आता यासंबंधी निर्णय घेतला असून, कुलसचिव डॉ. प्रफुल्ल पवार यांनी यासंबंधी परिपत्रक जारी केले आहे. ते म्‍हणतात,‘‘कोरोनाचा प्रादुर्भाव कमी होत चालला आहे. त्यामुळे स्वतंत्र खोल्या असलेली पीएच.डी. आणि स्पर्धा परीक्षेची वसतिगृहे सोमवारपासून सर्व नियमांचे पालन करून खुली करण्यात येत आहे. संबंधित विभागप्रमुखांनी विद्यार्थ्यांच्या निदर्शनास आणून द्यावे.’’ तसेच विद्यापीठ परिसरातील इतर वसतिगृहे ५० टक्के उपस्थितीत सुरु करण्यात येत असल्याचेही डॉ. पवार यांनी म्हटले आहे.

वसतिगृहे खुली करण्यासाठी आवश्यक सर्व डागडुजी आणि कोरोना संबंधीची तयारी पूर्ण झाली आहे. विभागानुसार वसतिगृहात प्रवेश मिळणाऱ्या विद्यार्थ्यांचीही यादी जाहीर करण्यात आली आहे. पीएच.डी. व स्पर्धा परीक्षा वगळता इतर वसतिगृहांना परवानगी मिळाल्यास वसतिगृहे खुली करण्यासाठी आवश्यक तयारी पूर्ण झाली आहे.

- डॉ. सचिन बल्लाळ, वसतीगृह प्रमुख, सावित्रीबाई फुले पुणे विद्यापीठ

आकडे बोलतात....

वसतिगृहांचा प्रकार संख्या प्रवेश क्षमता

मुले ९ १३४०

मुली ९ १२२७