पुणे: पुणे : उद्योगपती राहुल बजाज यांच्यावर रविवारी (ता.१३) संध्याकाळी साडेपाच वाजता पुण्यातील वैकुंठभूमीत शासकीय इतमामात अंत्यसंस्कार करण्यात आले. यावेळी राज्याचे गृहमंत्री दिलीप वळसे पाटील, महापौर मुरलीधर मोहोळ, खासदार सुप्रिया सुळे, योगगुरू बाबा रामदेव, पोलीस आयुक्त अमिताभ गुप्ता, जिल्हाधिकारी डॉ.राजेश देशमुख आदी उपस्थित होते.

बजाज यांचे ८३ व्या वर्षी शनिवारी (ता.१२) येथील खासगी रुग्णालयात निधन झाले होते. रविवारी सकाळपासून आकुर्डी येथील घरी पार्थिव अंत्यदर्शनासाठी ठेवण्यात आले होते. संध्याकाळी वैकुंठ स्मशानभूमीत अंत्यसंस्कार करण्यात आले. केंद्र सरकारने २००१ मध्ये त्यांना सर्वोच्च नागरी पुरस्कार पद्मभूषण पुरस्काराने सन्मानित केले. २००६ ते २०१० या कालावधीत ते राज्यसभेचे सदस्य होते. बजाज समूहाला पाच दशकांहून अधिक काळ आघाडीवर ठेवण्यात त्यांचा मोलाचा वाटा होता.

राहुल बजाज यांचा जन्म १० जून १९३८ रोजी कोलकता येथे झाला. १९६५ मध्ये त्यांनी बजाज समूहाची सूत्रे हाती घेतली. त्यांच्या सक्षम नेतृत्वाखाली कंपनीने कठीण काळातही यशाची नवी शिखरे गाठली. बजाज १९८० च्या दशकात दुचाकी स्कूटरची सर्वोच्च उत्पादक होती. त्यांनी अध्यक्षपद सोडल्यानंतर त्यांचा मुलगा राजीव बजाज यांनी ही जबाबदारी स्वीकारली.