पुणे : जीवनात कोणत्याही परिस्थितीत कायम वास्तववादी रहा. तुम्ही तुमच्या आयुष्यात जे काही कराल ते उत्कृष्टतेसाठी करा. जेव्हा तुम्ही उत्कृष्टता प्राप्त करता तेव्हा पैसा आणि प्रसिद्धी आपोआप तुमच्याकडे येते. आयुष्यात सिद्धांत हा पाया असला तरी वास्तविकतेला प्राधान्य द्या, असा सल्ला बजाज ऑटोचे व्यवस्थापकीय संचालक राजीव बजाज यांनी विद्यार्थ्यांना दिला.

लवळे येथील सिंबायोसिस इन्स्टिट्यूट ऑफ टेक्नॉलॉजी येथे बजाज इंजिनिअरिंग स्किल्स ट्रेनिंग (बेस्ट) केंद्राच्या उद््घाटन कार्यक्रमात ते बोलत होते. या वेळी सिंबायोसिसचे संस्थापक डॉ. शां ब. मुजुमदार, प्रधान संचालिका डॉ. विद्या येरवडेकर उपस्थित होते.

बजाज पुढे म्हणाले, ‘‘तुमची स्वतःची ओळख कायम सांभाळा. तुम्हाला आयुष्यात नेमके काय करायचे आहे ते ठरवा व त्यामध्ये स्पष्टता आणा.’’ डॉ. मुजुमदार यांनी सांगितले की, हे केंद्र म्हणजे उद्योग व शिक्षण क्षेत्रातील भागीदारीच्या क्रांतीची नांदी आहे. उद्योग जगतासाठी कुशल मनुष्यबळ घडवणे हा केंद्राचा उद्देश असेल. केतन कोटेचा यांनी स्वागत केले. कुलगुरू डॉ. रामकृष्णन रमण यांनी आभार मानले.