पिंपरी - पवना नदी, पुणे-मुंबई लोहमार्ग आणि देहूरोड संरक्षक विभाग यामुळे विस्ताराला मर्यादा असलेल्या रावेत परिसरात रस्त्यांचे जाळे विकसित केले जात आहे. सध्या मुख्य तीन रस्त्यांची कामे प्रगतिपथावर असून, सात रस्त्यांच्या कामांची निविदा प्रक्रिया पूर्ण झाली आहे. एकूण या दहा पक्‍क्‍या रस्त्यांमुळे परिसराच्या सर्वांगीण विकासाला गती मिळणार आहे. 

पवना नदी, लोहमार्ग, देहूरोड संरक्षक विभाग आणि मुंबई-बंगळूर महामार्ग यामुळे रावेत परिसराच्या विस्तार मर्यादित राहिला आहे. सुमारे वीस वर्षांपूर्वी रावेतचा महापालिकेत समावेश झाला. तेव्हापासून बंगळूर महामार्ग ते वाल्हेकरवाडीमार्गे चिंचवडगाव या एकाच एकेरी रस्त्याने रावेतचा पिंपरी-चिंचवडशी संपर्क होता. दरम्यान, पवना नदीवर बास्केट पूल उभारण्यात आला. त्यामुळे ताथवडे- थेरगावमार्गे पुणे, पिंपरी-चिंचवडशी; तर व डी. वाय. पाटील शैक्षणिक संकुलासमोरील रस्त्याच्या उभारणीमुळे आकुर्डी रेल्वे स्थानकाशी रावेत जोडले गेले. हळूहळू बागायती शेती कमी होत गेली.

शैक्षणिक संकुले व टोलेजंग इमारती उभ्या राहून गृहनिर्माण सोसायट्या निर्माण झाल्या. ‘इस्कॉन’च्या श्रीकृष्ण मंदिरामुळे रावेत जगाच्या नकाशावर पोचले. एकीकडे वस्ती वाढत असताना उपलब्ध रस्ते अपुरे पडू लागले. त्यामुळेच महापालिकेने रस्ते विकासाचे उद्दिष्ट समोर ठेवले. सध्या रावेतसह किवळे, मामुर्डी परिसरात रस्त्यांचे जाळे विणले जात आहे.

रावेतमध्ये तीन रस्त्यांची कामे पूर्णत्वाकडे आहेत. किवळे, मामुर्डी भागातही रस्त्यांची कामे प्रस्तावित आहेत. सात रस्त्यांच्या कामांची निविदा प्रक्रिया पूर्ण झाली असून, त्यांच्या उभारणीचे काम लवकरच सुरू होईल. 
- प्रशांत पाटील, कार्यकारी अभियंता, स्थापत्य विभाग, महापालिका

असे आहेत रस्ते
भक्ती-शक्ती चौक ते बंगळूर महामार्गाला जोडणाऱ्या बीआरटी रस्त्याचे काम सुरू आहे. सर्वे क्रमांक ७५ ते भोंडवे बाग रस्ता १८ मीटर रुंद केला जात आहे. शिंदे वस्ती कॉर्नर ते पाण्याची टाकी हा रस्ता १८ मीटर रुंद केला जात आहे. धर्मराज चौक ते इस्कॉन मंदिर हा लोहमार्गाला समांतर रस्ता २४ मीटर रुंद केला जात आहे. धर्मराज चौक ते बास्केट पूलदरम्यानचा रस्ता २४ मीटर रुंद केला जाणार आहे. मुकाई चौक ते बास्केट पूल रस्ता औंध बीआरटी रस्त्याला जोडला आहे. वाल्हेकरवाडी रस्त्याचे काम सुरू आहे. 

निविदा एक - २३ कोटी ५४ लाख 
निविदा दोन - ९ कोटी २३ लाख 
निविदा तीन - ९ कोटी २४ लाख