Pune News- छत्रपती श्री शिवाजी महाराज यांचे जन्मस्थान असलेल्या शिवनेरी किल्ल्यावरील अंबरखाना संग्रहालय आणि बालसंस्कारसृष्टीची घोषणा शिवजयंतीला किल्ल्यावर होण्याची दाट शक्यता आहे.

याबाबत उपमुख्यमंत्री आणि अर्थमंत्री अजित पवार यांनी सोमवारी (ता.12) मंत्रालयात तातडीची बैठक बोलविली आहे. याबाबत खासदार डाॅ. अमोल कोल्हे आणि आमदार अतुल बेनके यांनी मंत्री पवार यांच्याकडे पाठपुरावा केला होता.

तर मागील अर्थसंकल्पात शिवनेरीसह 6 किल्ल्यांवर शिवसृष्टी उभारण्याची घोषणा तत्कालीन अर्थमंत्री आणि विद्यमान उपमुख्यमंत्री देवेंद्र फडणवीस यांनी केली होती. तर मागील शिवजयंतीला तत्कालीन पर्यटनमंत्री मंगलप्रभात लोढा यांनी जुन्नर येथे शिवबालसंस्कार सृष्टीची घोषणा केली होती.

जुन्नरच्या सह्याद्री गिरिभ्रमण संस्थेच्यावतीने अंबरखाना इमारत संग्रहालयासाठी पाठपुरावा सुरू होता. जुन्नर तालुक्याला इ. स. पूर्व इतिहास असून, त्याची माहिती पर्यटकांना मिळत नाही. यामुळे किल्ल्यावरील अंबरखाना इमारतीमध्ये कायमस्वरूपी माहिती केंद्र आणि शिवकालीन शस्त्रास्त्र संग्रहालय उभारण्यात यावे, अशी मागणी सह्याद्री गिरिभ्रमण संस्थेने 19 फेब्रुवारी 2007 रोजी तत्कालीन मुख्यमंत्री विलासराव देशमुख यांच्याकडे केली होती.

तर खासदार अमोल कोल्हे यांनी शिवसंस्कार सृष्टीची मागणी केली होती. याबाबतचा सविस्तर प्रकल्प अहवाल देखील तयार असून, यावर उद्याच्या बैठकीत सविस्तर चर्चा होऊन, शिवजयंतीला घोषणा होण्याची दाट शक्यता आहे.