कात्रज (पुणे) : आजी तुझ्या हातचं जेवायचंच म्हणून शुभमने केलेला तो फोन शेवटचा ठरला. आजचा दिवस सुपेकर कुटुंबियासांठी काळा दिवस ठरला. मुंबई-बंगळुरु महामार्गावरील नवले पुलाजवळ मंगळवारी सकाळी ११ वाजता भीषण अपघात झाला. ब्रेक निकामी झालेल्या ट्रकने ७ दुचाकी व ८ चारचाकी वाहनांना अक्षरश: चिरडले. त्यामध्ये शुभम प्रकाश सुपेकर (वय २४) रा. ग्रीन व्हॅली सोसायटी याचा जागीच मृत्यू झाला. शुभमने सकाळी आपल्या आजीला फोन केला होता. फोन करुन शुभमने आजीला कारल्याची भाजी आणि भाकरी करुन ठेवण्याचे सांगून मी दुपारी जेवायला येणार असल्याचे सांगितले होते, पण हा अपघात झाल्याने त्याने आजीकडे भाकरी आणि कारल्याची भाजी खाण्याची इच्छा व्यक्त केलेली तशीच राहून गेली.

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा

दैनंदिन कामकाजासाठी शुभम हा घराबाहेर पडला होता. त्याच्या वडिलांकडे बिसलेरी कंपनीची डिलरशीप आहे त्या कामात तो वडिलांना मदत करायचा. दररोज सकाळी वितरणासाठी निघणाऱ्यां गाड्यांसाठी तो वडिलांना मदत म्हणून सकाळी डिझेल भरण्यासाठी जात असे. आजही त्याने घटनास्थळाच्या विरुद्ध बाजूला असणाऱ्या पंपावर सर्व गाड्यांना डिझेल भरून दिले आणि परतत असताना हा अपघात घडला. 

एमपीएससी परीक्षा पुढे ढकलावी; कोणी केली मागणी?

सुपेकर कुटुंबियांना शुभमच्या जाण्याने मोठा धक्का बसला आहे. शुभमचे वय २४ वर्ष असले तरी एक प्रकारे तो घरातील कर्ता पुरुष असल्याचे त्याचे वडील सांगतात. शुभमचे वय सहा वर्षे असताना त्याच्या आईचे निधन झाले होते. त्यानंतर घरात शुभमचे वडील आणि बहिण असे तिघेच होते. शुभमची बहिण लहान असून आता ती दहावीला आहे. शुभमची आई गेल्याची सल मनात असतानाच शुभमच्या जाण्याने कधीही न भरुन निघणारे नुकसान सुपेकर कुटुंबियांचे झाले आहे. शुभम वडिलांच्या व्यवसायात पूर्णपणे मदत करत असे त्यामुळे त्याच्या जाण्याने खूप मोठी पोकळी निर्माण झाली आहे.

डेक्कन कॉलेजकडे 'मॉडल' विद्यापीठ म्हणून पहावे : डॉ. भूषण पटवर्धन

दरम्यान, या अपघातामुळे महामार्गावरील वाहतूक विस्कळीत झाली होती. भरधाव ट्रकने रस्त्यावरुन जाणाऱ्या ७ ते ८ दुचाकींना उडविले, तरीही ट्रक थांबला नाही, त्यापुढेही वेगात जाणाऱ्या ट्रकने ८ ते ९ चारचाकी वाहनांना उडविले.