मंचर :“घोडेगाव (ता.आंबेगाव) येथील दिवानी व फौजदारी न्यायालयात ३०० लोकांची क्षमता असलेले सभागृहचे बांधकाम सुरू केले जाईल.अत्याधुनिक व्हिडिओ कॉन्फरन्स,ई फायलिंग सुविधा उपलब्ध करून देण्यात येतील.” असे मुंबई उच्च न्यायालयाच्या न्यायमूर्ती रेवती मोहिते-डेरे यांनी सांगितले.

घोडेगाव न्यायालयाला न्यायमूर्ती मोहिते-डेरे यांनी भेट दिली. त्यावेळी त्या बोलत होत्या. यावेळी त्यांचा सन्मान आंबेगाव तालुका वकील संघाचे अध्यक्ष अँड निलेश शेळके, अँड बाळासाहेब पोखरकर यांच्या हस्ते करण्यात आला. याप्रसंगी अँड मारुती ठोंबरे,अँड.मुकुंद काळे, अँड अनिल पोखरकर, अँड. संजय अर्विकर, अँड.प्रकाश शहाणे, अँड गायत्री काळे उपस्थित होते.

न्यायमूर्ती मोहिते-डेरे म्हणाल्या “उच्च न्यायालय वकील संघाच्या सर्व मागण्यांबाबत सकारात्मक आहे. आज पर्यंत जेवढी न्यायालय पाहिले त्यामध्ये तालुका पातळीवरील सर्वोत्कृष्ट न्यायालय म्हणून घोडेगाव न्यायालयाचा परिसर आहे. मी परत घोडेगाव येथील पायाभूत सुविधा व इतर प्रश्न संदर्भात चर्चा करण्यासाठी येईल.”

घोडेगाव येथील दिवाणी व फौजदारी न्यायालयास मुंबई उच्च न्यायालयाचे न्यायमूर्ती ए.एस डॉक्टर व पुणे जिल्हा प्रमुख न्यायाधीश शाम चांडक यांनी भेट देऊन पायाभूत सुविधांची पाहणी केली. यावेळी घोडेगाव वकील संघाच्या वतीने घोडेगाव येथे वरिष्ठ स्तर दिवानी न्यायालय व्हावे याबाबतचे निवेदन अँड निलेश शेळके यांनी दिले. अँड मुकुंद वळसे पाटील यांनी सूत्रसंचालन व अँड सागर गावडे यांनी आभार मानले.