सकाळ न्यूज नेटवर्क
नवी दिल्ली, ता.२४ ः ‘‘ देशात साखरेचे पुरेसे साठे असून कमी उत्पादन आणि साठेबाजीमुळे मागील काळामध्ये दर वाढले आहेत,’’ असे ‘इंडियन शुगर अँड बायो-एनर्जी मॅन्युफॅक्चरर असोसिएशन’कडून (इस्मा) सोमवारी सांगण्यात आले. ‘‘आगामी काळामध्ये साखरेचे दर कमी होतील,’’ असा विश्वास ‘इस्मा’चे अध्यक्ष नीरज शिरगावकर यांनी व्यक्त केला आहे.
हवामानाशी संबंधित समस्यांमुळे यंदा साखरेचे उत्पादन कमी झाले आहे. शिवाय साठेबाजी झाल्यामुळे दरात वाढ झाली आहे. वास्तविक देशात साखरेचे पुरेसे साठे असून सणासुदीच्या काळासाठी आवश्यक तितकी साखर उपलब्ध असल्याचे शिरगावकर यांनी नमूद केले. मागील महिनाभरात साखरेचे प्रति किलोचे दर २४ टक्क्यांनी वाढून साठ रुपयांवर गेले आहेत. वाढत्या दराच्या पार्श्वभूमीवर केंद्र सरकारने १० लाख टन करमुक्त साखरेच्या आयातीचा निर्णय घेतला होता.

साखरेची उपलब्धता वाढणार
सहकारी साखर महासंघाने २०२५-२६ या वर्षात २७९ लाख टन इतके साखरेचे उत्पादन होण्याचा अंदाज व्यक्त केला आहे. इथेनॉल निर्मितीसाठी वळविण्यात आलेल्या २४ लाख टनांचा यामध्ये समावेश नाही, अशी माहिती महासंघाचे कार्यकारी संचालक प्रकाश नाईकनवरे यांनी दिली. साखरेच्या नव्या हंगामाची सुरुवात १ ऑक्टोबर रोजी होईल. खुले साठे ३५ लाख टनापर्यंत जाऊ शकतात. देशाची दर महिन्याची साखरेची गरज २२ लाख टन इतकी आहे. कारखाने लवकर सुरू झाले तर साखरेची उपलब्धता बऱ्यापैकी वाढेल. त्यामुळे घाबरून जाण्याचे काही कारण नसल्याचे नाईकनवरे म्हणाले.

‘थायलंडमधून पुरवठा अशक्य’
‘‘केंद्राने दहा लाख टन साखरेच्या आयातीचा निर्णय घेतला असला तरी ब्राझील वगळता अन्य कोणताही देश मोठ्या प्रमाणात निर्यात करण्याच्या स्थितीत नाही. थायलंडमध्ये साखरेची कमतरता असल्याने तेथून साखर येण्याची शक्यता कमी आहे. ब्राझीलची साखर भारतात पोहोचण्यासाठी ४० ते ४५ दिवसांचा कालावधी लागतो. त्यामुळे १५ ऑक्टोबरपूर्वी नेमकी किती साखर परदेशातून देशात येईल, याचा अंदाज लावणे कठीण आहे,’’ असेही नाईकनवरे यांनी सांगितले.