पुणे : आपला चित्रपट हा पुणे आंतरराष्ट्रीय चित्रपट महोत्सवासारख्या व्यासपीठावर प्रदर्शित होतोय, त्याला प्रेक्षक प्रतिसाद देत आहेत. त्यांना चित्रपट आवडतोय, याचा आनंद हा वेगळाच आहे, अशा भावना आज महोत्सवांतर्गत दाखविण्यात येत असलेल्या आणि विविध विभागात समाविष्ट असलेल्या चित्रपटांच्या दिग्दर्शक, पटकथाकार, अभिनेते व अभिनेत्री यांनी व्यक्त केल्या.

लॉ कॉलेज रस्त्यावरील राष्ट्रीय चित्रपट संग्रहालय येथे आयोजित ‘कँडिड टॉक्स’ या कार्यक्रमाअंतर्गत पुणे आंतरराष्ट्रीय चित्रपट महोत्सवाचे कलात्मक दिग्दर्शक समर नखाते यांनी आज टक टक, तेन, गोत, कत्तील आणि फन’रल या चित्रपटांच्या चमुंशी संवाद साधला.

‘टक टक’ चित्रपटाचे पटकथाकार विशाल कुदळे आणि आशिष कलारिया, तेन या तमीळ चित्रपटातील अभिनेत्री अबरनाथी, गोत चित्रपटाचे दिग्दर्शक शैलेंद्र बागडे, निर्मात्या व अभिनेत्री किरण बागडे, कत्तील चित्रपटाचे दिग्दर्शक व अभिनेते ई. व्ही. गणेशबाबू व श्याम, फन’रल चित्रपटाचे दिग्दर्शक विजय दुबे, पटकथाकार रमेश दिघे, अभिनेते आरोह वेलणकर, हर्षद शिंदे व सिद्धेश पुजारे आदी या वेळी उपस्थित होते.

‘तेन’मधील अभिनेत्री अबरनाथी म्हणाल्या, “निसर्गाच्या सान्निध्यात राहणाऱ्या आदिवासी नागरिकांची अवस्था यामधून दाखविण्याचा आमचा प्रयत्न आहे.

‘गोत’ चित्रपटाच्या कथेद्वारे गोंड, कोरकू या आदिवासी जमातींमधील श्रद्धा, दंतकथा, चालीरीती आम्ही दाखविल्या आहेत. आदिवासी जमातीत बोलले जाणारे अनेक शब्द, संकल्पना आज नामशेष होत आहेत.

- शैलेंद्र बगाडे, ‘गोत’चा दिग्दर्शक

एखाद्या घरात मृत्यू झाला तर ते कुटुंब वेगळ्याच मानसिक अवस्थेत असते. अशा वेळी शेजारीपाजारी, नातेवाईक हे पुढे येत त्या व्यक्तीच्या अंतिम प्रवासाची तयारी करतात. हे करीत असताना चाळीतल्या चार तरुणांना एक वेगळाच मार्ग सापडतो. याची कथा ‘फन’रल’ या चित्रपटात पहायला मिळते.

- रमेश दिघे, पटकथाकार व निर्माता