पुणे : मद्यपीने पत्नीवर ब्लेडने वार केल्याची घटना कोंढवा भागात घडली. या प्रकरणी पतीविरुद्ध कोंढवा पोलिस ठाण्यात गुन्हा दाखल करण्यात आला आहे. रिमा सिसील भोसमाता-गिरी (वय २०, रा. सिद्धार्थनगर, कोंढवा) असे जखमी झालेल्या महिलेचे नाव आहे.

या प्रकरणी पती अनमोल लक्ष्मीकांत गिरी (वय ३४, रा. क्वीन्स गार्डन सोसायटी, कोंढवा) याच्याविरुद्ध गुन्हा दाखल करण्यात आला आहे. याबाबत रिमा यांनी फिर्याद दिली आहे. पोलिसांनी दिलेल्या माहितीनुसार, अनमोल याला दारू पिण्याचे व्यसन आहे.

दारू पिऊन तो पत्नीला त्रास देत असल्याने गेल्या वर्षभरापासून रिमा पतीपासून वेगळी राहत आहे. रिमा घरकाम करते. ती दुपारी कामावरून घरी निघाली होती. त्यावेळी अनमोलने तिला रस्त्यात अडवून शिवीगाळ केली. तिच्यावर ब्लेडने वार केले. पसार झालेल्या अनमोलचा शोध घेण्यात येत आहे.