माळशिरस, ता. १३ : ग्रामीण जागरूकता कार्यानुभव कार्यक्रमांतर्गत पुणे येथील कृषी महाविद्यालयातील कृषीकन्यांनी आंबळे गावातील विठ्ठल रामचंद्र जगताप यांच्या गोशाळेमध्ये भेट देऊन प्रगत जीवामृत प्रकल्प उभारला.

जीवामृत हे शेतीला वरदान असून, नैसर्गिक शेतीचा महत्त्वाचा स्तंभ आहे. पिकांना लागणारे अन्नघटक विरघळून ते पिकांना उपलब्ध करून देण्याचे काम सूक्ष्म जिवाणू करतात. जीवामृताच्या वापरामुळे जमिनीतील सेंद्रिय कर्बाचे प्रमाण वाढते. याचा वापर जगताप यांनी त्यांच्या शेतात केला असून, इतर शेतकऱ्यांनीदेखील याचा अवलंब करून शेतजमिनीचे आरोग्य जपावे, असा संदेश कृषीकन्यांनी दिला.

या उपक्रमाचे संयोजन कांचन भालेकर, गौरी भापसे, सुजाता धूळगंड, गावडे प्रियांका, जाधव दीप्ती, शीतल जाधव, गायत्री खतोडे, अनुराधा मधवे, माधुरी पवार, आकांक्षा थोरात, साक्षी तोरमड यांनी केले होते. या उपक्रमासाठी कृषीकन्यांना महाविद्यालयाचे सहयोगी अधिष्ठाता डॉ. एस. डी. मासाळकर, केंद्र समन्वयक डॉ. व्ही. जे. तरडे, केंद्रप्रमुख डॉ. यू. डी. जगदाळे, कार्यक्रम अधिकारी डॉ. पी. डी. सूर्यवंशी यांचे मार्गदर्शन लाभले.
--------------------