नारायणगाव, ता. १७ : नैसर्गिक शेती अभियानाअंतर्गत कृषी विज्ञान केंद्र (केव्हीके) नारायणगाव (ता. जुन्नर) येथे बुधवारी (ता. १९) सकाळी १० ते सायंकाळी ५ या वेळेत नैसर्गिक निविष्ठा निर्मिती प्रशिक्षण कार्यक्रमाचे आयोजन केल्याची माहिती केव्हीकेचे प्रमुख डॉ. प्रशांत शेटे यांनी दिली. डॉ. शेटे म्हणाले की, ‘‘नैसर्गिक शेतीचे महत्त्व वाढत आहे. कमी खर्चात, पर्यावरणाला अनुकूल व गुणवत्तापूर्ण नैसर्गिक निविष्ठा शेतकऱ्यांना घरच्या घरी कशा बनवता येतील, या बाबत प्रशिक्षणात प्रात्यक्षिकासह मार्गदर्शन करण्यात येणार आहे. या माध्यमातून शेतकरी शेतात उपलब्ध असलेल्या साधनसामग्रीपासून जीवामृत, बीजामृत, दशपर्णी अर्क आदी नैसर्गिक निविष्ठा तयार करून शेतीसाठी वापरू शकतात. यामुळे भांडवलात बचत होण्यास मदत होणार असून, शेती अधिक समृद्ध व विषमुक्त करण्यासाठी मदत होईल.’’ अधिक माहितीसाठी डॉ. योगेश यादव (मृदाशास्रज्ञ) (८२७५००५२१२), राहुल घाडगे (कृषी विस्तार तज्ञ) (९४२२०८००११) यांच्याशी संपर्क साधावा.