शिरूर, ता. १० : पालकमंत्री चंद्रकांत पाटील हे गुरुवारी (ता. १३) शिरूर तालुक्याच्या दौऱ्यावर येत असून, त्यांच्या हस्ते तालुक्यातील विविध विकास कामांचे उद्‍घाटन व भूमीपूजन होणार आहे.
भाजपचे तालुकाध्यक्ष आबासाहेब सोनवणे यांनी या दौऱ्याची माहिती दिली. गुरुवारी सकाळी दहा वाजता विठ्ठलवाडी येथून पाटील यांच्या दौऱ्याला सुरवात होणार आहे. महाराष्ट्र जीवन प्राधिकरणाच्या पाणीपुरवठा योजनेचे व विठ्ठलवाडी गावातील विविध विकास कामांचे उद्‍घाटन त्यांच्या हस्ते होणार आहे. सुमारे ३५० कोटी रुपये खर्चाच्या न्हावरे-चौफुला या राष्ट्रीय महामार्गाच्या कामाचे भूमीपूजन त्यांच्या हस्ते होणार असून, दुपारी बारा वाजता हा कार्यक्रम होणार आहे. त्यानंतर दुपारी एक वाजता शिरूर पंचायत समितीच्या सभागृहात होणाऱ्या कार्यक्रमात पाटील हे तालुक्यातील सरपंच व ग्रामपंचायत सदस्यांशी संवाद साधणार आहेत. त्यानंतर तेथेच प्रशासकीय अधिकाऱ्यांची स्वतंत्र बैठक घेऊन विकासकामांचा आढावा घेणार आहेत.
सायंकाळी चार वाजता न्हावरे फाटा येथील कानिफनाथ मंगल कार्यालयात होणाऱ्या पक्षाच्या मेळाव्यात पाटील मार्गदर्शन करणार असून, बुथप्रमुख, शक्ती केंद्र प्रमुख व निवडक पदाधिकाऱ्यांशी संवाद साधणार आहेत. यावेळी काही पक्षप्रवेश होणार आहे. सायंकाळी साडेसात वाजता येथील डॉ. बाबासाहेब आंबेडकर उद्यानात होणाऱ्या सोहळ्यात महात्मा फुले व डॉ. बाबासाहेब आंबेडकर संयुक्त जयंती उत्सव समितीच्या वतीने त्यांचा भीमरत्न पुरस्कार देऊन गौरव केला जाणार असल्याचे सोनवणे यांनी सांगितले.