उरुळी कांचन, ता. १० : लोणी काळभोर (ता. हवेली) येथील ग्रामदैवत अंबरनाथाचा उत्सव उत्साहात साजरा झाला. यानिमित्त धार्मिक कार्यक्रमांचे आयोजन केले होते. उत्सवाच्या दिवशी सकाळी श्रींना महामस्तकाभिषेक करण्यात आला. त्यानंतर अखंड हरिनाम सप्ताहातील कलशपूजन केले. चैत्र नवरात्रातील घटस्थापना, पाचव्या माळेनिमित्त सुवासिनींनी घाणा भरणे व हळद फोडण्याचा कार्यक्रम झाला. सातव्या माळेला सायंकाळी सात वाजता अंबरनाथ व जोगेश्वरीला हळद लावण्याचा कार्यक्रम झाला. त्यानंतर हनुमान जयंती दिवशी अंबरनाथ व जोगेश्वरी यांचा विवाह सोहळा पार पडला.
ढोल-ताशांच्या गजरात अंबरनाथ मंदिरातून श्रींची पालखी खोकलाईदेवी चौक, महात्मा फुले चौक, हनुमान मंदिर, विठ्ठल मंदिर मार्गे नवीन अंबरनाथ मंदिराकडे मार्गस्थ झाली. पालखीचे दर्शन घेण्यासाठी भाविकांनी गर्दी केली होती. उत्सवानिमित्त दुपारी गाण्यांच्या कार्यक्रमाचे व रात्री कुस्त्यांच्या स्पर्धांचे आयोजन केले होते. यावेळी यशस्वी मल्लांना रोख पारितोषिके देण्यात आली.