पुणे, ता. ६ : एकाच कुटुंबातील दोन अल्पवयीन मुलींचा लैंगिक छळ करणाऱ्याला न्यायालयाने पाच वर्षे सक्तमजुरी व २५ हजार रुपये दंडाची शिक्षा सुनावली. पोक्सो न्यायालयाचे विशेष न्यायाधीश के. के. जहागीरदार यांनी हा निकाल दिला. अमित सुरेश आहेर असे शिक्षा सुनावण्यात आलेल्याचे नाव आहे.
आहेर हा संबंधित मुलींच्या आईच्या ओळखीचा आहे. त्याने केलेल्या कृत्यांची माहिती मुलींनी त्यांच्या मावशीला दिली. त्यानंतर, मावशीने आरोपी विरोधात भोसरी पोलिस ठाण्यात फिर्याद दिली होती. या खटल्याचे कामकाज विशेष सरकारी वकील अरुंधती ब्रम्हे यांनी पाहिले. गुन्हा सिद्ध करण्यासाठी त्यांनी एकूण सहा साक्षीदार तपासले. दोन पैकी एक मुलगी खटला सुरू असताना फितूर झाली होती. मात्र, दुसऱ्या मुलीची साक्ष तसेच फिर्यादी मावशी व तपासी अंमलदार एन. ए. डावरे यांची साक्ष गुन्ह्यात महत्त्वाची ठरली. न्यायालयीन कामकाजात सरकार पक्षाला भोसरी पोलिसांनी मदत केली सहकार्य केले. दंडाची रक्कम न भरल्यास अतिरिक्त एक वर्षे कारावास भोगावा लागेल, असे आदेशात नमूद आहे.