पुणे, ता. २२ : जिल्ह्यात १५ ते १७ वयोगटातील मुलांच्या कोरोना प्रतिबंधक लसीकरणात ग्रामीण भागाने आघाडी घेतली असून, पात्र लाभार्थींपैकी सुमारे ८० टक्के मुलांचा पहिला डोस पूर्ण झाला आहे. त्या तुलनेत पुणे शहरातील विद्यार्थ्यांचे लसीकरण खूप कमी प्रमाणात झाले आहे. त्यामुळे शहरात मुलांच्या लसीकरणाचा वेग वाढवा, असा आदेश उपमुख्यमंत्री व पालकमंत्री अजित पवार यांनी दिला आहे.

जिल्ह्यातील कोरोना संसर्गाचा आढावा घेण्यासाठी शनिवारी आयोजित केलेल्या बैठकीत ते बोलत होते. या वेळी लोकप्रतिनिधी, स्थानिक स्वराज्य संस्थांचे प्रतिनिधी आणि वरिष्ठ अधिकाऱ्यांना कोरोनाचा प्रतिबंधासाठी करण्यासंदर्भात त्यांनी सूचना दिल्या. पवार म्हणाले, ‘‘शहर व जिल्ह्यातील खासगी रुग्णालयांमध्येही कोरोना रुग्णांवर उपचार सुरु करण्याची सोय उपलब्ध करून द्यावी. याबाबत संबंधित रुग्णालयांना सूचना द्याव्यात. वाढत्या संसर्गाच्या पार्श्वभूमीवर उपलब्ध खाटांच्या योग्य नियोजनाकडे लक्ष द्यावे.’’

विधान परिषदेच्या उपसभापती डॉ. नीलम गोऱ्हे, पुण्याचे महापौर मुरलीधर मोहोळ, पिंपरी चिंचवडच्या महापौर उषा ढोरे, जिल्हा परिषदेच्या अध्यक्षा निर्मला पानसरे, खासदार वंदना चव्हाण, विभागीय आयुक्त सौरभ राव, जिल्हाधिकारी डॉ. राजेश देशमुख, मुख्य कार्यकारी अधिकारी आयुष प्रसाद आदींसह शहर व जिल्ह्यातील लोकप्रतिनिधी या वेळी उपस्थित होते.
या बैठकीपूर्वी पवार यांच्या हस्ते जिल्हा नियोजन समिती सदस्य संतोष कांचन यांनी हवेली तालुक्यातील उरुळी कांचन गावासाठी दिलेल्या रुग्णवाहिकेचे लोकार्पण
करण्यात आले. उरुळी कांचन येथील श्री प्रयागधाम ट्रस्टतर्फे शहरातील गरीब नागरिकांसाठी ३०० चादरी भेट देण्यात आल्या.

सक्रिय कोरोना रुग्णांची संख्या वाढली
विभागीय आयुक्त सौरभ राव यांनी सादरीकरणाद्वारे जिल्ह्यातील कोरोना संसर्ग परिस्थितीची बैठकीत माहिती दिली. पुणे जिल्ह्यात मागील आठवड्याच्या तुलनेत सक्रिय कोरोना रुग्णांच्या संख्येत ३२ हजार ९२२ ने वाढली आहे. १५ ते १८ वयोगटातील ५१ टक्के मुलांचा कोरोना प्रतिबंधक लशीचा पाहिला डोस पूर्ण झाला आहे. पुणे शहरात रक्षक नगर येथील क्रीडा संकुलात २७५ खाटांचे कोविड केअर सेंटर सुरू करण्यात आले त्यांनी सांगितले.

पुणे शहरातील अधिकाधिक कोरोना रुग्ण
घरच्या घरीच उपचार घेत असले, तरी वाढता संसर्ग लक्षात घेऊन कोविड केअर सेंटरमधील यंत्रणा आतापासूनच सज्ज ठेवावी. कोरोना रुग्णांना उपचारासाठी त्रास होणार नाही, याची दक्षता घ्यावी. ज्येष्ठ नागरिकांना बूस्टर डोस द्यावा आणि खासगी कंपन्यांमधील सर्व कर्मचाऱ्यांचे लसीकरण पूर्ण करावे.
-अजित पवार, उपमुख्यमंत्री