पुणे, ता. १८ : विद्यार्थ्यांनी गुगल व विकिपीडियावर अवलंबून न राहता वाचनावर भर देत पुराव्यांच्या आधारे मूलभूत संशोधन करावे. डॉ. बाबासाहेब आंबेडकर यांनी सांगितल्याप्रमाणे ज्ञानाची निर्मिती करणे हे आपले ध्येय असायला हवे,’’ असा संदेश ज्येष्ठ विचारवंत डॉ. हरी नरके यांनी विद्यार्थ्यांना दिला.

सावित्रीबाई फुले पुणे विद्यापीठाच्या पाली व बौद्ध अध्ययन विभागातर्फे पुणे स्टेशन येथील डॉ. बाबासाहेब आंबेडकर सांस्कृतिक भवनात महात्मा ज्योतिबा फुले आणि डॉ. बाबासाहेब आंबेडकर यांच्या जयंतीनिमित्त कार्यक्रम आयोजित केला. यावेळी प्रा. नरके बोलत होते. ‘भारत भाग्यविधाता : ज्योतिराव आणि भीमराव’ विषयावर त्यांनी मांडणी केली. कार्यक्रमात विद्यार्थ्यांनी वैयक्तिक व सामूहिक गीते, पथनाट्य आणि गायनाने आदरांजली वाहिली. यावेळी विभागप्रमुख डॉ. महेश देवकर उपस्थित होते.