पुणे, ता. ९ ः प्रियदर्शनी वुमन्स फोरम आणि बिटिया फाउंडेशनच्या वतीने दरवर्षीप्रमाणे गौरी-गणपती साहित्य जत्रेचे आयोजन केले आहे. या साहित्य जत्रेत महिला बचत गटांनी उत्पादित केलेल्या वाती ते मूर्तीपर्यंतच्या सर्व वस्तू एकाच छताखाली उपलब्ध करून दिल्या जातात. यंदा जत्रा रविवारपासून (ता. १०) ते १७ सप्टेंबरपर्यंत भरणार आहे.
ही जत्रा काँग्रेस भवनच्या पटांगणामध्ये भरविण्यात येणार आहे. उद्‌घाटन रविवारी दुपारी साडेचार वाजता महाराष्ट्र प्रदेश महिला काँग्रेसच्या अध्यक्षा संध्या सव्वालाखे यांच्या हस्ते करण्यात येणार आहे. यावेळी अभिनेत्री स्मिता गोंदकर, आरती शिंदे, काँग्रेसचे पुणे शहर अध्यक्ष अरविंद शिंदे आदी उपस्थित राहणार असल्याचे प्रियदर्शनी वुमन्स फोरम आणि बिटिया फाउंडेशनच्या अध्यक्षा संगीता तिवारी यांनी सांगितले.
तिवारी म्हणाल्या, ‘‘एकाच ठिकाणी गौरी-गणपतीचे सर्व साहित्य मिळावे ही मुख्य संकल्पना आहे. रोज सायंकाळी वेगवेगळे कार्यक्रम आयोजित केले आहेत. कार्यक्रमाची सुरुवात गणेश वंदना आणि मी सावित्री बोलतेय या कार्यक्रमांनी होणार आहे. त्यानंतर आठवडाभर मंगळागौर कार्यक्रम, फॅशन शो, नऊवारी फॅशन शो, लहान मुलांचा टॅलेंट शो, ऑर्केस्ट्रा आदी विविध कार्यक्रमांचे आयोजन केले आहे. हे सर्व कार्यक्रम मोफत असणार आहेत.’’