पुणे, ता. ६ : ‘बिंदू क्लिअर राईट्स फाउंडेशन’ आणि ‘युतक चॅरिटेबल ट्रस्ट’तर्फे महाराष्ट्रातील एकमेव ‘एलजीबीटीक्यू साहित्य संमेलना’चे आयोजन करण्यात आले आहे. यंदा या संमेलनाचे तिसरे वर्ष आहे, अशी माहिती बिंदू क्लिअर राईट्स फाउंडेशनचे संस्थापक बिंदुमाधव खिरे यांनी दिली.
पौड फाटा येथील द बॉक्स येथे रविवारी (ता. ८) सकाळी पावणे दहा ते सायंकाळी सहा वाजेपर्यंत हे संमेलन होणार आहे. यावेळी सहाय्यक पोलिस आयुक्त भानुप्रताप बर्गे (निवृत्त), ‘मिळून साऱ्याजणी’ आणि ‘पुरुष उवाच’च्या संपादक डॉ. गीताली वि. मं., बडोदा अखिल भारतीय मराठी साहित्य संमेलनाचे माजी अध्यक्ष श्रीकांत देशमुख, भारतातील पहिले एलजीबीटीक्यू कार्यकर्ते अशोक कवी उपस्थित असणार आहेत.
या संमेलनामध्ये चर्चा सत्र, मुलाखत, अनुभव कथन, कविता वाचन, पुस्तक परिचय, कथा वाचन, पालक कट्टा या उपक्रमांचा सहभाग आहे. याविषयी बोलताना युतक चॅरिटेबल ट्रस्टचे संस्थापक अध्यक्ष अनिल उकरंडे म्हणाले, ‘‘पुणे शहराने नेहमीच, वंचित दुर्लक्षित चळवळींना दिशा देण्याचं काम नेहमीच केले आहे. एलजीबीटीक्यू चळवळ केवळ जून महिन्यातील प्राइड वॉक पुरती मर्यादित नाही. आमच्या समाजाच्या समस्या आणि साहित्य यांना मुख्य प्रवाहातील साहित्य संमेलनाने दुर्लक्षित केले. त्यामुळे आम्ही डॉ. बाबासाहेबांच्या विचारांनी प्रेरित होऊन एलजीबीटीक्यू समाजाचे साहित्य संमेलन आयोजित केले आहे.’’