पुणे: ‘सारथी’च्या माध्यमातून मराठा (maratha) समाजातील तरुणांना त्या त्या जिल्ह्यातील स्थानिक गुणवैशिष्ट्यानुसार कौशल्य विकासासाठी तांत्रिक प्रशिक्षण द्यावे. जेणेकरून तरुण व्यावसायिकांना अण्णासाहेब पाटील आर्थिक विकास महामंडळाच्या कर्ज योजनेअंतर्गत कर्जपुरवठा करून त्यांना स्वावलंबी बनवता येईल, असा प्रस्ताव म्हाडाचे माजी अध्यक्ष समरजितसिंह घाटगे (Samarjeet singh Ghatge) यांनी ‘सारथी’ संस्थेला दिला. या वेळी ‘सारथी’च्या सदस्यांनी या प्रस्तावाला सकारात्मकता दर्शवली.

‘सारथी’ संस्थेच्या कार्यालयात गुरुवारी ही बैठक पार पडली. ‘सारथी’चे अध्यक्ष अजित निंबाळकर, संचालक मधुकर कोकाटे, व्यवस्थापकीय संचालक अशोक काकडे, निबंधक अशोक पाटील, मुख्य लेखा व वित्त अधिकारी नीता नागर, रोजगार व कौशल्य विकासच्या सहायक संचालक अनुपमा पवार, प्रकल्प संचालिका ज्योत्स्ना शिंदे, डॉ. श्रीकांत देशमुख आदी बैठकीस उपस्थित होते.

घाटगे म्हणाले, ‘सध्या व्यवसायासाठी तरुण पुढे येत आहेत. परंतु त्यांना अचूक तांत्रिक प्रशिक्षण नाही. या विषयाच्या अनुषंगाने कोल्हापूर जिल्ह्यामध्ये २२ सहकारी बँकांना एकत्र करून समन्वय कक्ष स्थापन केला आहे. त्यातून स्वतःचा उद्योग सुरू करणाऱ्यांना कर्जपुरवठा करून प्रोत्साहन देण्यात येत आहे. परंतु अनेक तरुणांना स्थानिक गुणवैशिष्ट्यांच्या उद्योगांचे प्रशिक्षण नाही. त्यामुळे त्यांना अडचणीचे होत आहे. अशा प्रशिक्षणानंतर बँकांचे क्लस्टर, ‘सारथी’ आणि अण्णासाहेब पाटील महामंडळ यांच्या संयुक्त विद्यमाने व्यवसायासाठी प्रयत्न करता येतील. त्या माध्यमातून मराठा समाजाला उद्योगासाठी प्रोत्साहन देऊन त्या तरुणांना स्वतःच्या पायावर उभे करण्याचे राजर्षी छत्रपती शाहू महाराजांचे स्वप्न साकारता येईल.’