पुणे : शहरात शाळा, रुग्णालयांमध्ये महापालिकेने लसीकरण केंद्र सुरू केले असले तरी काही जणांना केंद्रांवर येता येत नाही. तर ज्या ठिकाणी १०० पेक्षा जास्त जणांचे लसीकरण होऊ शकते, अशा कामाच्या ठिकाणी जाऊन मोफत लसीकरण करण्याचा प्रयत्न महापालिका करते. त्याच माध्यमातून शहरात आतापर्यंत १५९ ठिकाणी ३० हजार ३७७ जणांचे लसीकरण करण्यात आले आहे.

कोरोनाचा धोका टाळण्यासाठी लसीकरण हाच प्रभावी पर्याय आहे. त्यामुळे नागरिक मोफत लसीकरणाला प्रतिसाद देत आहेतच, पण मोफत मिळाली नाही तर खासगी रुग्णालयात जाऊन सशुल्क लसीकरण करून घेत आहेत. मुख्य महापालिका भवनात घनकचरा विभागात मंगळवारी लसीकरण मोहीम राबविण्यात आली. ही मोहीम सुरू झाल्यापासून शहरात १५९ ठिकाणी महापालिकेचे पथक जाऊन तेथे ३० हजार ३७७ जणांना लस दिली आहे. त्यामध्ये सामाजिक संस्थांच्या माध्यमातून वृद्धाश्रम आणि विशेष दिव्यांगांसाठी ५५ ठिकाणी पाच हजार २०२ जणांचे लसीकरण केले तर विविध संस्था आणि शासकीय संघटनांच्या माध्यमातून १०४ ठिकाणी लसीकरण केले. तेथे २५ हजार १७५ जणांनी लाभ घेतला.

''पुण्यात लसीकरण मोहीम सुरू झाल्यानंतर सामाजिक संस्था, वृद्धाश्रम, विशेष नागरिकांसाठी काम करणाऱ्या संस्था व शासकीय संस्थांच्या माध्यमातून १५९ ठिकाणी लसीकरण करण्यात आले आहे. त्यामध्ये ३० हजारांपेक्षा जास्त नागरिकांना त्यांच्या निवास व कामाच्या ठिकाणी जाऊन लसीकरण करण्यात आले आहे.''
- डॉ. वैशाली जाधव, सहाय्यक आरोग्य प्रमुख, पुणे महापालिका