पुणे : कोरोना प्रतिबंधक लसीकरण मोहिमेअंतर्गत उद्या (सोमवारी) ७२ केंद्रांवर लस देण्यात येणार आहे. त्यापैकी ५६ केंद्रावर कोविशील्ड लस दिली जाईल. उपलब्ध साठ्यापैकी ६० टक्के लस ही ४५ वर्षे वयावरील नागरिकांना पहिला डोस देण्यासाठी राखीव असणार आहे.

४५ वर्षे वयापुढील नागरिकांनी १५ मार्च पूर्वी पहिला डोस घेतला आहे, त्यांना सोमवारी लस मिळणार आहे. ६० टक्के लस ही ४५ वर्षे पुढील नागरिकांना पहिल्या डोससाठी दिली जाईल. उर्वरित लस ही दिव्यांग, स्तनदा माता, हेल्थकेअर, फ्रंट लाईन वर्कर्स यांना प्राधान्याने दिली जाईल. याशिवाय ज्या नागरिकांनी नोंदणी केली नाही, परंतु ते केंद्रांवर आले असतील आणि लस शिल्लक असल्यास त्यांना ‘ऑन दि स्पॉट’ नोंदणी करून ती देण्यात येईल.

कोव्हॅक्सिनचे लसीकरण १६ केंद्रांवर सुरू राहणार आहे. उपलब्ध साठ्यापैकी १० मे पूर्वी ज्यांनी पहिला डोस घेतला आहे. अशा साठ टक्के नागरीकांना दुसरा डोस देण्यात येईल. उर्वरित ४० टक्के लस ही ‘ऑन द स्पॉट’ नोंदणी करून दिली जाणार आहे.

घोरपडी पेठेत लसीकरण केंद्र

पुणे महापालिकेच्या वतीने घोरपडी पेठेतील उर्दू शाळा क्रमांक १३ मध्ये कोविड लसीकरण केंद्र सुरू करण्यात आले आहे. भागामध्ये लसीकरण केंद्र जवळ नसल्याने नागरिकांना गाडीखाना, भवानी पेठ, गुरुवार पेठ या केंद्रांवर जावे लागत होते. तेथेही प्रचंड गर्दी होत असल्याने लोकांना लस घेण्यासाठी पहाटे जाऊन नंबर लावावा लागत होता. नागरिकांना होत असलेली गैरसोय लक्षात घेऊन नगरसेवक अजित दरेकर यांच्या हे केंद्र सुरू करण्यात आले आहे. केंद्रांचे उद्‌घाटन दरेकर यांच्या हस्ते करण्यात आले.