आळेफाटा, ता. २० : जुन्नर तालुक्याच्या पूर्व भागात उन्हाळ्यामुळे वन्यप्राण्यांची पाण्यासाठी होणारी वणवण थांबवण्यासाठी वन विभागाने पुढाकार घेतला आहे. आळे (ता. जुन्नर) परिसरातील विविध गावांमधील जंगलातील पाणवठ्यांमध्ये पाणी सोडून प्राण्यांची तहान भागवण्याचे काम युद्धपातळीवर सुरू केले आहे. तालुक्यात सध्या उन्हाची तीव्रता वाढल्याने नैसर्गिक पाण्याचे स्रोत आटले आहेत. या पार्श्वभूमीवर आळे वन परिक्षेत्रांतर्गत येणाऱ्या आळे, संतवाडी, कोळवाडी, पिंपरी पेंढार, वडगाव आनंद, पादीरवाडी, राजुरी आणि उंचखडक या गावांतील जंगलात कृत्रिम पाणवठे तयार केले आहेत. या पाणवठ्यांमध्ये वन विभागाच्या वतीने टँकरद्वारे पाणी सोडण्यात येत आहे.