महिला, मुलींना मिळणार पोलिस अन्‌ संगणक प्रशिक्षण
महिला व बालकल्याण समितीचे निर्णय; ८४ लाखांच्या कामांना मंजुरी

सकाळ वृत्तसेवा
सोलापूर, ता. २१ : महापालिकेच्या महिला व बालकल्याण समितीच्या बैठकीत विविध महत्त्वपूर्ण निर्णय घेण्यात आले. महिला व मुलींसाठी संगणक प्रशिक्षण, गरजूंसाठी पोलिस भरतीपूर्व प्रशिक्षण, शाळांमध्ये शुद्ध पिण्याच्या पाण्याची सुविधा आणि सॅनिटरी नॅपकिन वेंडिंग मशिन बसविण्यासाठी ८४ लाखांची तरतूद असून, या कामांना मंजुरी दिल्याची माहिती निर्मला जंगम यांनी दिली.
महिला व बालकल्याण समितीची बैठक आज सभापती निर्मला जंगम यांच्या अध्यक्षतेखाली पार पडली. या सभेत शहरातील महिला व मुलींना कौशल्य विकासाच्या माध्यमातून स्वावलंबी बनविणे, विद्यार्थ्यांना शैक्षणिक सुविधा उपलब्ध करून देणे आणि महिला व मुलींच्या आरोग्याला प्राधान्य देण्यात आले. या प्रशिक्षणासाठी १९ ऑगस्ट ते २ सप्टेंबर २०२६ या कालावधीत अर्ज स्वीकारण्यात येणार आहेत. शहरातील महिला व मुलींसाठी संगणक प्रशिक्षणाचे आयोजन करण्यात येणार आहे.
महिला व मुलींच्या आरोग्यविषयक गरजा लक्षात घेऊन मनपाच्या प्रसूतिगृहांमध्ये, माध्यमिक शाळांमध्ये तसेच महापालिका इमारतींमध्ये सॅनिटरी नॅपकिन वेंडिंग मशिन बसविण्यात येणार आहेत. तसेच मनपाच्या शाळांमधील विद्यार्थ्यांना शुद्ध पिण्याचे पाणी उपलब्ध व्हावे, यासाठी वॉटर प्युरिफायर बसविण्याचा निर्णय घेण्यात आला.
२०२६-२७ या आर्थिक वर्षात पात्र व गरजू महिला व मुलींसाठी पोलिस भरतीपूर्व प्रशिक्षण सुरू करण्यात येणार आहे. यामध्ये एकल महिला आणि त्यांच्या मुलींना तसेच सन २०२५-२६ मध्ये बारावी उत्तीर्ण झालेल्या १८ ते २५ वयोगटातील मुलींना विशेष प्राधान्य देण्यात येणार आहे. या निर्णयामुळे आर्थिकदृष्ट्या दुर्बल घटकांतील मुलींना पोलिस दलात प्रवेशासाठी आवश्यक प्रशिक्षणाची संधी उपलब्ध होणार आहे.