पुणे - ठेकेदाराला सांगून कामावरून काढून टाकल्यामुळे शिवीगाळ करणाऱ्या कामगाराचा त्याच्या मित्रांनी हत्याराने वार करुन खून केला. ही घटना केसनंद रस्त्यावरील वाघोली परिसरात मंगळवारी (ता. २२) रात्री दहा वाजण्याच्या सुमारास घडली.

शैलेश मांडगीकर असे खून झालेल्या कामगाराचे नाव आहे. या प्रकरणी राम सुभाष श्रीराम (वय २५, रा. बेरळी बुद्रुक, मुखेड, जि. नांदेड) आणि गोपाल ज्ञानोबा कोटालापुरे (वय २५, रा. नांदेड नाका, महादेवनगर जि. लातूर) या दोघांवर गुन्हा दाखल करण्यात आला आहे.

याबाबत संगम चंद्रशेखर धारिया (वय २३, रा. कुशीनगर, उत्तर प्रदेश, सध्या रा. सिट्रोन सोसायटीसमोर, वाघोली) याने लोणीकंद पोलिस ठाण्यात फिर्याद दिली आहे. पोलिसांनी दिलेल्या माहितीनुसार, मृत व्यक्ती आणि आरोपी हे कामगार आहेत.

मंगळवारी रात्री वाघोली-केसनंद रस्त्यावरील सिट्रोन सोसायटीसमोर दारु पीत बसले होते. ठेकेदाराने श्रीरामच्या सांगण्यावरुन मांडगीकरला कामावरून काढल्यामुळे त्यांच्यात वाद झाला. मांडगीकर याने श्रीराम आणि कोटलापुरे या दोघांना दारुच्या नशेत शिवीगाळ केली. त्यामुळे रागाच्या भरात आरोपींनी मांडगीकर याच्यावर हत्याराने डोक्यावर वार करून खून केला.

घटनेनंतर आरोपी पसार झाले असून, पोलिस त्यांचा शोध घेत आहेत. पुढील तपास पोलिस निरीक्षक (गुन्हे) मारुती पाटील करीत आहेत. पोलिस उपायुक्त शशिकांत बोराटे, येरवडा विभागाचे सहायक पोलिस आयुक्त संजय पाटील, वरिष्ठ पोलिस निरीक्षक विश्वजीत काईंगडे आदींनी घटनास्थळी भेट दिली.