विश्रांतवाडी : दिघी-आळंदी रस्त्यावर (Dighi-Alandi Road) आर्मी पब्लिक स्कूलजवळ (Army Public School) एका भरधाव बलेनो कारने दुचाकीस जोरदार धडक दिल्याने स्वप्निल प्रदीप खरबडे (गजानन महाराजनगर, दिघी) हा तरुण जागीच ठार झाला. तर, प्रतीक सुरेश चांदोरे (गजानन महाराज मंदिर, दिघी) हा जखमी झाला.

पोलिसांनी दिलेल्या माहितीनुसार, फिर्यादी आणि त्याचा मित्र विश्रांतवाडीवरून आळंदी रोडने जात असताना समोरून निळ्या रंगाची बलेनो कार आली आणि त्याने त्यांना जोरदार धडक दिली. या धडकेत स्वप्निलचा जागीच मृत्यू झाला.

अपघातानंतर बलेनो कारचा चालक सतीश वाळके हा पळून गेला. याबाबत विश्रांतवाडी पोलिस ठाण्यामध्ये (Vishrantwadi Police Station) गुन्हा दाखल झाला असून खडकी विभागाच्या सहायक पोलिस आयुक्त आरती बनसोडे, विश्रांतवाडी पोलिस ठाण्याच्या वरिष्ठ पोलिस निरीक्षक कांचन जाधव यांच्या मार्गदर्शनाखाली तपास अधिकारी सहायक पोलिस निरीक्षक अंसार शेख, पोलिस उपनिरीक्षक नितीन राठोड तपास करीत आहेत. अपघातील फरार आरोपी सतीश वाळके याला पकडण्यासाठी पोलिसांची चार पथके रवाना झाली आहेत.