चाकण - बिरदवडी, ता. खेड येथील गावच्या हद्दीतील बैलगाडा शर्यतीच्या घाटात एका तरुणाचा कोयत्याने, कुऱ्हाडीने वार करून निर्घृणपणे खून करण्यात आला. ही घटना आज सायंकाळी साडेपाचच्या सुमारास घडली.

खून केल्यानंतर दोघे आरोपी पळून गेले होते. संबंधित संशयित आरोपींचा पोलीसांनी शोध घेऊन दोघांना ताब्यात घेतले. ईश्वर पंडित पवार (वय -32, रा. बिरदवडी, ता. खेड) असे खून झालेल्या तरुणाचे नाव आहे. हा खून जमिनीच्या मिळालेल्या पैशाच्या वादातून नात्यातील आरोपींनी केला आहे.

या खूनप्रकरणी संशयित आरोपी ओंकार काचोळे, हनुमंत नायकवाडी या दोघा तरुणांना ताब्यात घेतले आहे. अशी माहिती सहाय्यक पोलीस आयुक्त राजेंद्र सिंह गौर, चाकण पोलीस ठाण्याचे वरिष्ठ पोलीस निरीक्षक अशोक कदम यांनी दिली.

पोलिसांनी दिलेल्या माहितीनुसार, ईश्वर हा त्याचा बैलगाडा घेऊन घाटामध्ये पळविण्यास गेला होता . त्यावेळी इतरही तरुण बैलगाडा पळविण्यासाठी घाटात आले होते. त्यावेळी दोघे आरोपी दुचाकीवरून आले होते. ईश्वर याच्यावर जवळच्या नात्यातील रोहकल, ता. खेड येथील दोघांनी कोयत्याने, कुऱ्हाडीने वार केले. त्यात गंभीर जखमी झाल्याने तो बेशुद्ध झाला. तो मृत पावल्याचे समजून आरोपी पळून गेले.

आरोपीनी कोणीही मध्ये पडू नये असा दम इतरांना भरला होता. जखमी झालेल्या ईश्वरला चाकण येथील एका खाजगी रुग्णालयात उपचारासाठी आणण्यात आले, परंतु उपचारापूर्वीच त्याचा मृत्यू झाला असल्याचे संबंधित डॉक्टरांनी सांगितले.

या घटनेची माहिती मिळाल्यानंतर पिंपरी -चिंचवडचे पोलीस उपायुक्त डॉ. शिवाजी पवार, सहाय्यक पोलीस आयुक्त राजेंद्रसिंह गौर, चाकण पोलीस ठाण्याचे वरिष्ठ पोलीस निरीक्षक अशोक कदम व पोलीस अधिकारी, कर्मचारी घटनास्थळी गेले. रात्री उशिरा पंचनामा सुरु होता तसेच गुन्हा दाखल करण्याचे काम सुरु होते. ईश्वर याच्या पाठीमागे आई-वडील, पत्नी, एक भाऊ, लहान मुलगा, मुलगी असा परिवार आहे. तो इलेक्ट्रिक ची कामे करत होता.