मुंबई : मुलांचे उच्च शिक्षण आणि इतर गरजांसाठी निधी उपलब्ध करण्याच्या उद्देशाने भारतीय आयुर्विमा महामंडळ अर्थात ‘एलआयसी’ने ‘अमृतबाल’ ही नवी आयुर्विमा योजना दाखल केली आहे. ही योजना शनिवारपासून (ता. १७) ऑफलाइन आणि ऑनलाइन पद्धतीने उपलब्ध झाली.

या योजनेत किमान ३० दिवस आणि कमाल १३ वर्षे वयापर्यंतच्या मुलांच्या नावे गुंतवणूक सुरू करता येते. प्रत्येक पॉलिसी वर्षाच्या शेवटी प्रतिहजार ८० रुपये दराने परतावा जमा केला जातो. पॉलिसीची मुदत संपताना मुलाचे किमान वय १८ वर्षे आणि कमाल वय २५ वर्षे आवश्यक आहे. प्रीमियम पेमेंटसाठी पाच, सहा किंवा सात वर्षांचे पर्याय उपलब्ध आहेत.

मर्यादित प्रीमियम पेमेंट पर्यायासाठी किमान मुदत १० वर्षे आहे, तर एकरकमी प्रीमियमसाठी किमान मुदत पाच वर्षे आहे. एकरकमी प्रीमियम भरल्यास पॉलिसीची कमाल मुदत २५ वर्षे आहे. किमान विमा रक्कम दोन लाख रुपये असून, कमाल रकमेसाठी कोणतीही मर्यादा नाही.

मुदतीनंतर मिळणारी रक्कम पाच, दहा आणि १५ वर्षांच्या हप्त्यांमध्ये घेण्याचा पर्याय उपलब्ध आहे. या पॉलिसीवर कर्जाचीही सुविधा आहे. या योजनेत एजंटांच्या माध्यमातूनही गुंतवणूक करता येईल, असे ‘एलआयसी’ने म्हटले आहे.