मुंबई - चलनवाढ चार टक्क्यांच्या आत आणण्यासाठी आणि त्याचबरोबर भारताचा विकासदर कायम राखण्यासाठी रिझर्व बँकेने आज सलग चौथ्यावेळी रेपो रेट आहे तोच म्हणजे साडेसहा टक्क्यांवर कायम ठेवला. सप्टेंबर मध्ये ग्राहक निर्देशांक चलनवाढ किंचित घटेल असाही रिझर्व बँकेने अंदाज व्यक्त केला आहे.

गेले दोन दिवस सुरू असलेल्या रिझर्व बँकेच्या द्वैमासिक पतधोरण समितीच्या बैठकीनंतर गव्हर्नर शक्तिकांत दास यांनी आज याबाबतची माहिती दिली. रेपो रेट कायम ठेवण्याचा निर्णय समितीने पाच विरुद्ध एक अशा बहुमताने घेतल्याचेही ते म्हणाले. मे २०२२ पासून रिझर्व बँकेने रेपो दरवाढ सुरू करून फेब्रुवारी २०२३ पर्यंत तो दर साडेसहा टक्क्यांपर्यंत आणला होता. त्यानंतर हा दर कायम आहे.

या वर्षासाठी ग्राहक निर्देशांक चलनवाढ ५.४ टक्क्यांवर राहील तर पुढील वर्षाची चलनवाढ ४.५ टक्क्यांच्या मर्यादेत येईल असा अंदाजही त्यांनी व्यक्त केला. सप्टेंबर महिन्यात किरकोळ चलनवाढ ४.९ टक्क्यांवर येऊ शकते पण ऑक्टोबर ते डिसेंबर या तिमाही ती फारशी घसरणार नाही असा अंदाजही त्यांनी व्यक्त केला. सप्टेंबरला चलनवाढ कमी होणार असली तरी असमान पावसामुळे खरिपाच्या पेरणीत झालेली घट, तेलाचा कमी साठा आणि अन्न आणि ऊर्जा यांच्या जागतिक किमतीतील अस्थिरता यामुळे चलनवाढीचा अंदाज अस्थिर असल्याचे ते म्हणाले.

या आर्थिक वर्षात देशाचा जीडीपी साडेपाच ते साडेसहा टक्क्यांच्या दरम्यान वाढण्याची अपेक्षा आहे. जुलै ते सप्टेंबर दरम्यान जीडीपी वाढीची अपेक्षा आहे तीच म्हणजे ६.५ टक्के ठेवण्यात आली आहे. ऑक्टोबर ते डिसेंबर दरम्यान ही वाढ ६ टक्क्यांच्या आसपास होईल. जानेवारी ते मार्च २०२४ दरम्यान जीडीपी ५.७ टक्क्यांनी वाढेल तर एप्रिल ते जून २०२४ दरम्यान जीडीपी ६.६ टक्के वाढेल असा अंदाजही त्यांनी व्यक्त केला. यापूर्वीच्या या अंदाजात कोणताही बदल करण्यात आला नाही.

जुलै ते सप्टेंबर या तिमाहीत ग्राहक किंमत निर्देशांक चलनवाढ ६.४ टक्के होईल असा अंदाज आहे, आधी हा अंदाज ६.२ टक्के होता. ऑक्टोबर ते डिसेंबर या तिमाहीतील चलनवाढीचा अंदाज ५.६ टक्के वर्तविण्यात आला आहे. तो आधी ५.७ टक्के होता. २०२४ च्या जानेवारी ते मार्च तसेच एप्रिल ते जून या दोन तिमाही दरम्यानचा चलनवाढीचा अंदाज तोच म्हणजे ५.२ टक्के ठेवण्यात आला आहे.