Muhurat Trading 2023: दिवाळी आता अगदी तोंडावर आली आहे. हा दिवाळीचा सण फक्त सर्वसामान्यांसाठीच खास नसून शेअर बाजारासाठीही या दिवसाचे विशेष महत्त्व आहे. दिवाळीला शेअर बाजार बंद असला तरी संध्याकाळचा 1 तासाचा मुहूर्त (दिवाळी मुहूर्त ट्रेडिंग) असतो.

दिवाळीच्या निमित्ताने, मुहूर्त ट्रेडिंगसाठी 15 मिनिटांचे प्री-ओपनिंग सत्र संध्याकाळी 6 पासून सुरू होते. ट्रेडिंग 6.15 वाजता सुरू होते आणि 7.15 पर्यंत चालू राहते, त्यानंतर बाजार 7.25 पर्यंत स्थिरावतो. यंदाचे मुहुर्त ट्रेडींग 12 नोव्हेंबरला लक्ष्मीपुजनाच्या दिवशी आहे.

मुहूर्त ट्रेडिंग म्हणजे काय?

गुंतवणूकदार दिवाळीत केलेल्या खरेदीला शुभ मानतात. त्यामुळेच दिवाळीला बाजार बंद असतानाही केवळ शगुनच्या मुहूर्तावर लोक खरेदी करतात. मुहूर्ताच्या ट्रेडिंगच्या निमित्ताने अनेकांना नफा कमावण्याचा विचार असला, तरी बहुतांश लोकांचा भर केवळ शेअर्स खरेदीवर असतो.

जरी लोकांना बरेच शेअर्स विकत घ्यायचे नसले तरी ते शगुन म्हणून एक किंवा दोन शेअर्स खरेदी करतात आणि ते त्यांच्या पोर्टफोलिओमध्ये ठेवतात. या दिवशी शेअर्स खरेदी करणाऱ्यांना वर्षभर नफा मिळतो, असा व्यापारी वर्गाचा समज आहे.

दिवाळीच्या दिवशी शेअर बाजारातील मुहूर्त ट्रेडिंगची परंपरा नवीन नसून, ती सुमारे 5 दशकांपासून सुरू आहे. मुहूर्त ट्रेडिंग हे बीएसईमध्ये 1957 मध्ये सुरू झाले होते, तर एनएसईमध्ये ते 1992 मध्ये सुरू झाले. मुहूर्त ट्रेडिंग ही परंपरा म्हणून पाहिली जाते आणि प्रत्येक गुंतवणूकदार-व्यापारी या दिवशी आपले आवडते शेअर्स खरेदी करतात.

नोंद: क्रिप्टो मार्केट, शेअर मार्केट किंवा म्युच्युअल फंडातील गुंतवणुकीत जोखीम असते. यामध्ये फायद्याप्रमाणे नुकसान होण्याचीही शक्यता असते. त्यामुळे क्रिप्टो, शेअर बाजार किंवा म्युच्युअल फंडातील कोणतीही गुंतवणूक करण्याआधी आपल्या वित्तीय सल्लागारासोबत चर्चा करूनच गुंतवणूक करा.