Share Market Closing Latest Update 8 December 2023: शेअर बाजारात शुक्रवारीही नवे विक्रम झाले. आज निफ्टी 21006, निफ्टी बँक 47303 आणि सेन्सेक्सनेही आज 69,893 च्या विक्रमी पातळीला स्पर्श केला. शेवटी निफ्टी 68 अंकांनी वाढून 20,969 वर आणि सेन्सेक्स 303 अंकांनी वाढून 69,825 वर बंद झाला. आज आयटी, बँकिंग आणि रिअल इस्टेट क्षेत्रामुळे बाजारात तेजी होती.

क्षेत्रीय निर्देशांकाची स्थिती

आजच्या व्यवहारात बँकिंग क्षेत्रातील शेअर्समध्ये जोरदार खरेदी दिसून आली. याशिवाय आयटी, कंझ्युमर ड्युरेबल्स शेअर्समध्येही वाढ झाली. तर ऑटो, फार्मा, हेल्थकेअर, तेल आणि वायू, ऊर्जा, धातू, एफएमसीजी क्षेत्रातील शेअर्समध्ये विक्री दिसून आली.

आजच्या व्यवहारात मिड कॅप आणि स्मॉल कॅप शेअर्सच्या वाढीला ब्रेक लागला आहे. दोन्ही निर्देशांक घसरणीसह बंद झाले. सेन्सेक्समधील 30 शेअर्सपैकी 19 शेअर्स वाढीसह आणि 11 शेअर्स घसरणीसह बंद झाले. तर निफ्टीच्या 50 शेअर्सपैकी 24 शेअर्स वाढीसह आणि 26 शेअर्स घसरणीसह बंद झाले.

सेन्सेक्समध्ये कोणते शेअर्स वाढले?

सेन्सेक्समधील 30 शेअर्सपैकी 19 शेअर्स आज वाढीसह बंद झाले. यामध्ये एचसीएल टेकच्या शेअर्समध्ये सर्वाधिक 2.92 टक्के वाढ झाली. तर जेएसडब्ल्यू स्टील, इन्फोसिस, एचडीएफसी बँक आणि अॅक्सिस बँकेचे शेअर्स वाढीसह बंद झाले.

सेन्सेक्समध्ये कोणते शेअर्स घसरले?

सेन्सेक्समधील 11 शेअर्स आज घसरणीसह बंद झाले. यामध्ये आयटीसीचे शेअर्स 1.95 टक्क्यांनी घसरले. तर, महिंद्रा अँड महिंद्रा (M&M), बजाज फायनान्स, टाटा मोटर्स आणि नेस्ले इंडियाचे शेअर्स घसरणीसह बंद झाले.

गुंतवणूकदारांचे 84,000 कोटी रुपयांचे नुकसान झाले

BSE वर सूचीबद्ध कंपन्यांचे एकूण बाजार भांडवल आज 8 डिसेंबर रोजी 349.36 लाख कोटी रुपयांवर घसरले आहे, जे त्याच्या आधीच्या ट्रेडिंग दिवशी म्हणजे गुरूवार, 7 डिसेंबर रोजी 350.14 लाख कोटी रुपये होते.

अशाप्रकारे, BSE मध्ये सूचीबद्ध कंपन्यांचे मार्केट कॅप आज सुमारे 84,000 कोटी रुपयांनी कमी झाले आहे. किंवा दुसऱ्या शब्दांत, गुंतवणूकदारांच्या संपत्तीत सुमारे 84,000 कोटी रुपयांची घसरण झाली आहे.